GuDDe Miyan Ki Shadi, Urdu Nazam By Akhgar Mushtaq Raheem Aabadi

guDDe miyan ki shadi
har ek samt gunje hue qahqahe
hansi dil-lagi zamzame chahchahe
zamin muskura aasman KHub jhum
ki baqi nagar mein hai shadi ki dhum
yahan mehman aur wahan mehman
jidhar dekhiye aur jahan mehman
gharaz mehman aae hain be-shumar
ki muddat se is din ka tha intizar

nausha banane ki rasm

wo guDDe miyan ghar bulae gae
biTha kar wo nausha banae gae
hatheli pe mehndi rachai gai
wo nausha ko achkan pahnai gai
wo ganw ka mali 'atiq' aa gaya
wo sarson ke phulon ka sahra bandha
har ek rasm se jab faraghat hui
to mirchon ke phulon ki baddhi paDi
wo ham-joliyon mein laga qahqaha
marasan jo ban kar uThin 'hashima'
marasan bhi Dholak bajaane lagi
KHushi ke tarane sunane lagi
marasan ko munh manga haq jab mila
ba-mushkil marasan se pichha chhuTa

baraat ki rawangi

wo nausha miyan pahne goTe ka haar
chale ek meinDhe pe ho kar sawar
chhana-chhan chhana-chhan baraati chale
patili ke dhakne bajate hue
wo 'annu' gawayya bhi gata hua
fazaon mein tanen uData hua
nai zindagani mubarak rahe
mubarak ye shadi mubarak rahe
baraat dulhan ke makan pahunch chuki ab nikah ka waqt hai
'qamar' hain wakil aur 'aqila' gawah
'surayya' ki guDiya ka dekho byah
wo 'raziya' ko qazi banaya gaya
wo nausha ko mahfil mein laya gaya
wo qazi waraq ek ulaTne lage
baraati sab ek ja simaTne lage

qazi ji nikah paDhate hain

musammat-e-gul duKHtar-e-shaiKH 'KHar'
ba-mahr-e-muajjal bayasi hazar
gulistan ka moti samundar ka phul
kaho bhai guDDe ye shadi qubul

chhohaaron ki taqsim

paDha kar uThe jaise qazi nikah
kisi ne chhohaaron ki de di salah
chhohaaron ki thaali luTai gai
shakar bhi maze le ke khai gai
kisi ne chhohaaron se Topi bhari
shakar bhi kahin KHub phanki gai
magar ek sahab kamand-e-hawa
kahen kis se apna ajab majra
ye har chand bachpan ke hushiyar the
chhohaaron ki luTTas pe tayyar the
magar bhiD mein aise kuchh ye dabe
ki har panw ke niche kuchle gae
paTa-paT chhohaare baraste rahe
magar ye bichaare taraste rahe
koi nak par koi sar par laga
magar un ke munh tak na koi gaya
shakar aankh aur kan mein ghus gai
bichaare ki puri hi durgat bani
natija ye sab jald-bazi ka tha
ki in ka maza kirkira ho gaya

dulhan ki ruKHsati

wo chhoTa sa ek box laya gaya
miyana jise tha banaya gaya
sawari ye dulhan ki thi aa gai
wo baiThi dulhan wo hui ruKHsati
kahaar apne kandhe badalte chale
miyane pe dulha ki dulhan liye
kuDum-dhum kuDum-dhum chali phir baraat
lagi gunjne gane baje se raat
anar aur chhachhundar chhuTate hue
nichhawar ke paise luTate hue
sahar hote hote makan aa gae
dulhan le ke guDDe miyan aa gae

baraat wapas aa kar

yahi mehmanon mein hai guftugu
ki dulhan hai be-shak baDi KHub-ru
saliqe ke sasural wale bhi hain
dikhawa nahin mal wale bhi hain
ye sardi ki subh aur sardi ki sham
magar qabil-e-dad har intizam
ye bartan ye kapDe ye kursi ye mez
mila hai bahut KHubsurat jahez
sada phir wo 'annu' ki aane lagi
fazaon mein masti luTane lagi
nai zindagani mubarak rahe
mubarak ye shadi mubarak rahe