Masrooron Se Bhi Ksb Kamal Kaisay Gaya, Urdu Ghazal By Aleem Athar

مصوّروں سے بھی کسبِ کمال کیسے گیا

کہ لازوال بدن سے جمال کیسے گیا

وہ روبرو ہو تو آئینہ بھی چٹخنے لگے

بٹیں جو عکس تو شیشے سے بال کیسے گیا

مری تو نیند ترے ساتھ گفتگو میں لگی

کُھلی جو آنکھ تو پھر بول چال کیسے گیا

وہ اشک ہو کے جو رخسار کو کرے نمکیں

لبوں سے پوچھ وہ آبِ زُلال کیسے گیا

کچھ ایسے لگنے لگا ہے کوئی مقابل ہے

وہ اپنے ہاتھ سے سکّہ اچھال کیسے گیا

پلک جھپکتے ہی ایسے جواب کیا ملتا

میں حیرتوں میں رہا گم سوال کیسے گیا

میں ایک لمحے میں صدیاں گذار آیا ہوں

میں اپنے وقت میں لوٹا تو سال کیسے گیا

فرشتہ جان کے دل کا مکیں بنائیں کیا

وہ جاتے جاتے مری جاں نکال کیسے گیا

خبر بھی کیا ہے کہ فکرِ مآل کیسے گئی

نہال کوچہ میں آشفتہ حال کیسے گیا

الٹ دیا ہے فقیروں نے کاسہءِ دل بھی

پھر اپنے نام کا سکّہ بھی ڈال کیسے گیا

سنا ہے لوگ بچھڑنے سے پہلے مرتے ہیں

میں چار روز ترے بِن نکال کیسے گیا

دھواں دھواں ہے فضا، بھیڑ چال چھٹنے لگی

ہجومِ شہر بتا اشتعال کیسے گیا

میں تخت چھوڑ کے تختہ پہ خود چڑھا ہوں علیم

وہ لڑکھڑاتا ہوا کوتوال کیسے گیا