Nazar Jadu Jagati Hai, Urdu Nazam By Arifa Shahzad

وه جادو گر نظر جس پل بھی میری سمت آتی ہے

شعاع زرفشاں بن کر وه ہر سو جگمگاتی ہے

چمکتی کہکشاؤں کے حسیں منظر دکھاتی ہے

محبت کی حسیں لے میں ڈھلا نغمہ سناتی ہے

نظر جادو جگاتی ہے

دکھوں کی گرد سے بوجھل ہوا جب سرسراتی ہے

کسی بھی تشنہ کامی کی کسک جب کسمساتی ہے

اداسی جب بھی صحن دل میں آ ،ڈیرے لگاتی ہے

زبان خامشی سے یہ مجھے سب دکھ بھلاتی ہے

نظر جادو جگاتی ہے

کبھی ماضی کی سرگوشی مرے کانوں میں آتی ہے

کبھی موجود لمحے کی چبھن الجھن جگاتی ہے

حقیقت آنے والے پل کی جب مجھ کو ڈراتی ہے

نظر اٹھ کر مجھے اپنی پناهوں میں بلاتی ہے

نظر جادو جگاتی ہے

مرے چاروں طرف پھیلے سبھی منظر سجاتی ہے

مری آنکھوں کے رستے سے مرے من میں سماتی ہے

کلی من کی کھلاتی ہے، مجھے اپنا بناتی ہے

مری پلکوں کی چلمن تو حیا سے سے جھک سی جاتی ہے

نظر جادو جگاتی ہے