Panah Dey Nahi Raha, Urdu Nazam By Arifa Shahzad

پناہ دے نہیں رہا بدن مجھے

یہ سر سراہٹیں

کہ گونج بن گئیں

نقاب اوڑھ کر

ہے لمس ہنس رہا

یہ پور پور میں

اتر رہا ہے کیا؟

زبان

چکھ نہیں رہی ہے

ذائقہ!

یہ دن کی بند آنکھ کھل نہیں رہی

مجھے یہ شام بھی تو

تھامتی نہیں

ہے رات پر

قیام کر نہیں رہی

کوئی ہے شے

کلام کر نہیں رہی!

ہواوں سے سبک بدن

زمین میں ہے گڑ گیا

حصار کھینچ دے

چہار سمت یوں وجود کا

سوال اٹھ سکے نہ کوئی

بود اور نبود کا

مجھے تو

مسکراہٹوں میں آنکھ کی

سمیٹ لے

لپیٹ آئینے سبھی

اتار عکس

روح میں!

کسی بھی سرد شام

تھام ہاتھ

اور شفق کےرنگ

کہرسےلپٹتے

باغ کی روش کے نام کر

کبھی اتر تو ساتھ میرے

اجنبی زمین پر

ہواوں کے مہین پر

یقین کر

وہ لمس ہیں

جو ان کوچھو کے

دیکھ لے

بدن پناہ دے اسے!