Ibn E Safi Ki Yaad Mein, Urdu Nazam By Azeez Belgaumi

قدر داں اِبنِ صفی کے آج بھی موجود ہیں

آشنا اِبنِ صفی سے جو نہیں، محدود ہیں

اِن کا جاسوسی ادب ہر گز بھی بے مقصد نہ تھا

اُن کے قد سے میل کھا جائے کسی کا قد نہ تھا

اُن کا وہ عمران سیریز آج تک بھی یاد ہے

دِل نشیں کردارِ عمران و فریدی یاد ہے

اِن کے یہ کردار باکردار تھے، یا للعجب!

عہدِ نَو میں، صاحبِ ایثار تھے، یا للعجب!

اہلِ ”جرمن“ آپ کی ناول نگاری پر فدا

تھیں کرسٹینابھی شیدا آپ کے فن پر سدا

گو مزاج اِنکا کبھی تفریح کا منکِر نہ تھا

اِن کا جاسوسی ادب تفریح کی خاطر نہ تھا

کر لیا تھا احترامِ زن سے چپکے سے نباہ

اور کبھی پھیری نہیں عورت کی جانب بد نگاہ

تھا بڑا ہی خوشگوار اِنکے ہُنر کا بانکپن

اِن کے تھا پیشِ نظر اک اونچا مقصد اور مشن

پڑھنے والے کی بھی بڑھ جاتی تھی بے شک اہلیت

اِن کے ناول نے کی یوں ذہنوں کی فکری تربیت

اِن کے ذہنِ تخلیقی کا کوئی بھی ثانی نہ تھا

تھیم تھے پاکیزہ تر، اُسلوب عریانی نہ تھا

اُن کے ناول کی زباں بہتر زباں کی تھی مثال

ردّوکدّو بحثا بحثی ہو یا کوئی قیل و قال

اِس قدر دِلچسپ ہوتی اُردوئے اِبنِ صفی

سحر میں اِبن صفی کے ڈوبتا قاری کبھی

کیا کوئی جاسوس تھے اِبنِ صفیِ خوش خصال!

آپ جاسوسی ادب کے بادشاہِ باکمال

ہیں عزیزم شاہِ جاسوسی ادب، ابنِ صفی

ہیں نہیں مشہوریوں ہی بے سبب، ابنِ صفی