Bap, Urdu Nazam By Ejaz Farooqi

wo ek pul tha
mere aur ajdad ke zamanon ka nuqta-e-ittisal
us ki guzargahon se riwayaton aur hikayaton ke hazar-ha qafile nikal kar
nae zamane ki yurishon se meri bikharti ana mein
ulfat yaqin aur e'timad ke rang bhar gae hain
wo ek pul aaj TuT kar gahri ghaTiyon mein gira hai
ab main khaDa hun
un gahri ghaTiyon par
main ek pul hun
wo ek bargad tha
jis ki chhanw mein ek ThanDi miThas thi
jis ne jalte suraj ki hiddaten apne jism mein jazb kar ke
us ki sunahri kirnon ko ThanDi shabnam ki tarah
meri ujaD aankhon mein qatra qatra utara
wo aaj hiddaton ke wafur se jal gaya
to ab main hi ek bargad hun
aane walon ke waste ek ThanDi chhanw

wo ek jawwala tha
wo bharpur zist karne ki ek simabi aarzu
wo lahu ki dhaDkan
jo raat ki zulmaton pe shab-KHun mar kar
raushni aur ummid ke darichon ko kholta
aaj shab ka saffak hath
us ke lahu ki dhaDkan ko le uDa
aur ab faqat main hun
raat ki zulmaton se panja-fagan