Karam Yogi, Urdu Nazam By Ghalib Ahmad

karam yogi hai
paikar-e-jism mein rahta hai
mere sath
us ki aawaz mere dil se nikal kar
phunkti hai meri ruh mein naghmon ka KHumar
phul khilte hain sitaron ke mere aangan mein
meri sakhiyan meri hamjoliyan aati hain mujhe milne
to wo mil baiThta hai
us ki aasudagi-e-dil dar-o-diwar se bahar
kisi mahki hui KHushbu ki tarah phailti hai
phail kar chumti hai har kas-o-na-kas ke qadam

kya karun dil mera diwana hai
paikar-e-jism mein rahta hua yogi hai wafa ki taswir
apni tabir ko KHwabon mein basa leti hun
koi aazurda-badan koi KHizan-dida chaman
us ki phaili hui KHushbu se agar jag uThe
to mujhe gham hota hai