Yeh Mera Watan Mera Watan Mera Watan Hai, Urdu Nazam By Hassan Mehmood

مرکز ہے امیدوں کا یہ خوشیوں کا چمن ہے

سر سبز زمیں اور حَسیں نیلا گَگَن ہے

عظمت کا گواہ اِس کی زماں اور زَمَن ہے

یہ میرا وطن، میرا وطن، میرا وطن ہے

وہ علم کا طالب ہے کہ مزدور و کساں ہے

خدمت میں مگن اس کی ہر اک فرد یہاں ہے

ہر کوئی سپاہی کی طرح معرکہ زن ہے

یہ میرا وطن، میرا وطن، میرا وطن ہے

صحراؤں، پہاڑوں پہ ڈٹے جس کے پِسر ہیں

اور بحر و فضا میں بھی جواں سینہ سِپر ہیں

حُرمت کیلئے جس کی ہر اک سر بہ کفن ہے

یہ میرا وطن، میرا وطن، میرا وطن ہے

محنت میں ہے عظمت پہ یقیں اِن کا مصمم

ہے قابل رشک اِن کا جنوں جذبہ و دم خم

دہقاں کے نہ مزدور کے چہرے پہ تھکن ہے

یہ میرا وطن، میرا وطن، میرا وطن ہے

پیکر ہیں خودی کے یہ ہیں اقبال کے شاہیں

اور راہ نما ان کے ہیں قائد کے فرامیں

دل ان کے ہیں پُرجوش تو سینوں میں اَگن ہے

یہ میرا وطن، میرا وطن، میرا وطن ہے

محبوبِ خدا کے ہیں محبان یہاں ہر

اخلاص کے بندے ہیں مسلمان یہاں پر

اللہ کی رحمت کی گھٹا سایہ فگن ہے

یہ میرا وطن، میرا وطن، میرا وطن ہے

وہ جس کے گلی کوچے ہیں تہذیب کے دھارے

اور جس کی جبیں پر ہیں کئی چاند ستارے

ہے علم کا گہوارہ بھی اور مرکزِ فن ہے

یہ میرا وطن، میرا وطن، میرا وطن ہے

ہو کھیل کا میداں تو فتح اس کا مقدر

ہو رزم تو کانپے ہے عدو خوف سے تھر تھر

اس کا تو ہر اک وار ہی دندان شکن ہے

یہ میرا وطن، میرا وطن، میرا وطن ہے

عالم میں ہو ممتاز یہی سب کی دعا ہے

دشمن ہوں سبھی زیر ہر اک دل کی صدا ہے

اقوام کا قائد بنے ہم سب کی لگن ہے

یہ میرا وطن، میرا وطن، میرا وطن ہے

بنیاد میں ہی اس کی شہیدوں کا لہو ہے

افواج سے ہیبت زدہ ہر ایک عدو ہے

جی جان سے حرمت پہ تو قربان حسن ہے

یہ میرا وطن، میرا وطن، میرا وطن ہے