Agar Hain Batil Ke Hath Lambe To Haq Bhi Be Dast O Pa Nahi Hai, Urdu Ghazal By Hassan Mehmood

اگر ہیں باطل کے ہاتھ لمبے تو حق بھی بے دست و پا نہیں ہے

نشے میں بدمست جرم ہے گر تو عدل بھی بے عصا نہیں ہے

خدا کی جانب سے جب عطا ہو تو روک سکتی نہیں یہ دنیا

اُسی کا حق تھا اسے ملا جو، تمہاری کچھ بھی سخا نہیں ہے

نہیں ہو ناراض تم بھی دل سے کہ سب یہ تیور بناوٹی ہیں

گرج چمک اور باد و باراں ہے پر وہ کالی گھٹا نہیں ہے

جو ڈوبتے شخص نے تمہیں دیکھ کر ہلایا ہے ہاتھ اپنا

سلام ہے اس کا الوداعی مدد کی یہ التجا نہیں ہے

تمہاری آنکھوں میں مستقل ہی نمی سی رہنے کا عارضہ ہے

یہ دردِ دل ہے ہی مرض ایسا کہ جس کی کوئی شفا نہیں ہے

تیری محبت تو ماں کی الفت سے بھی ہے ستر گنا زیادہ

تو ماں کے جیسے ہی معاف کرنا بس اور کوئی دعا نہیں ہے

خدا کے بندے! خدا تو رب ہے، خدا کے احکام ہی چلیں گے

خلاصہء جبر و قدر یہ ہے ہر ایک شے من تشا نہیں ہے

جہاں میں مقبولیت کے معیار آج کل کچھ بدل گئے ہیں

یہ کیسی چھیڑی ہے تان تو نے کوئی تیرا ہم نوا نہیں ہے

لبادہ اوڑھے ہوئے ہیں دیں کا مگر ہے پرچار نفرتوں کا

کچھ ایسے منبر نشیں بھی ہیں جن کو فکرِ روزِ جزا نہیں ہے

زمیں سے رشتہ بحال رکھ تو کہ خاک خاکی کا ہے ٹھکانہ

یہ سب مراتب ہیں چند روزہ کسی کی شاہی سدا نہیں ہے

حسن تری بات دل سے نکلی سو اہل دل تک پہنچ رہی ہے

پیام تیرے کا عام ہونا بشرطِ بادِ صبا نہیں ہے