Zulf Andher Karne Wali Hai, Urdu Ghazal By Hatim Ali Mehr

zulf andher karne wali hai
tum ne nagan bala ki pali hai

qalamen ruKHsar-e-yar par dekho
surKH hai phul sabz Dali hai

ghair par lutf hai sitam hum par
un ki jo baat hai nirali hai

wah kya munh se phul jhaDte hain
kitni pyari tumhaari gali hai

murgh-e-dil bhi hai sath chiDiya ke
jal angiya ki un ki jali hai

shab-e-furqat ko dekh baKHt-e-siyah
koi bhi raat itni kali hai

kyun qayamat ki chaal chalti ho
is mein aashiq ki paemali hai

dahan-e-yar ka pata na laga
baat kahne ko ek bana li hai

naf-e-mashuq saf moti ki
nannhi-munni si ek pyali hai

kyunkar un ko dun mehr-o-mah se misal
jin ko dawa-e-be-misali hai

rang lai gilauriyan kah kar
lal honThon pe aur lali hai

dil tasawwur mein mahw rahta hai
aashiq-e-shahid-e-KHayali hai

kyun hansae na mujh se rind ko bang
duKHt-e-raz ki bahan hai sali hai

dam ghanimat hai us masiha ka
ab tabibon se shahr KHali hai

KHak uDai hai un ke kuche ki
hum ne sar par zamin uTha li hai

dil mera le ke arsh par hai dimagh
aur hi ab mizaj-e-ali hai

kyun buton ki hamein mohabbat di
kya musibat KHuda ne Dali hai

wan kabhi ghair se kabhi hum hain
roz mauqufi aur bahaali hai

de ke ek bosa-e-lab-e-jaan-baKHsh
tan-e-be-jaan mein jaan Dali hai

kya bala gori gori rangat par
zulf kali hai aankh kali hai

haal mein shairi ka hai ye Dhang
apna jo sher hai wo haali hai

dekho mujh par bahut sitam na karo
pas ai jaan kotawali hai

hum se inkar wasl ka hai abas
hogi jo baat hone wali hai

un ke kuche mein KHak ho jaen
hum ne ek rah ye nikali hai

yar pahlu mein hai na jam-e-sharab
ye bhi KHali hai wo bhi KHali hai

hai sitam ye anile-pan ka banao
kan mein ek ek baali hai

us ke mazhab ka eatibar hai kya
'mehr' ek rind-e-la-ubaali hai