Kisi Ke Haath Kahan Yeh Khazana Aata Hai, Urdu Ghazal By Idris Babur

کسی کے ہاتھ کہاں یہ خزانہ آتا ہے

مرے عزیز کو ہر اک بہانہ آتا ہے

ذرا سا مل کے دکھاؤ کہ ایسے ملتے ہیں

بہت پتا ہے تمہیں چھوڑ جانا آتا ہے

ستارے دیکھ کے جلتے ہیں آنکھیں ملتے ہیں

اک آدمی لئے شمع فسانہ آتا ہے

ابھی جزیرے پہ ہم تم نئے نئے تو ہیں دوست

ڈرو نہیں مجھے سب کچھ بنانا آتا ہے

یہاں چراغ سے آگے چراغ جلتا نہیں

فقط گھرانے کے پیچھے گھرانا آتا ہے

یہ بات چلتی ہے سینہ بہ سینہ چلتی ہے

وہ ساتھ آتا ہے شانہ بہ شانہ آتا ہے

گلاب سنیما سے پہلے چاند باغ کے بعد

اتر پڑوں گا جہاں کارخانہ آتا ہے

یہ کہہ کے اس نے سمسٹر بریک کر ڈالا

سنا تھا آپ کو لکھنا لکھانا آتا ہے

زمانے ہو گئے دریا تو کہہ گیا تھا مجھے

بس ایک موج کو کر کے روانہ آتا ہے

چھلک نہ جائے مرا رنج میری آنکھوں سے

تمہیں تو اپنی خوشی کو چھپانا آنا ہے

وہ روز بھر کے خلائی جہاز اڑاتے پھریں

ہمیں بھی رج کے تمسخر اڑانا آتا ہے

پچاس میل ہے خشکی سے بحریہ ٹاؤن

بس ایک گھنٹے میں اچھا زمانہ آتا ہے

بریک ڈانس سکھایا ہے ناؤ نے دل کو

ہوا کا گیت سمندر کو گانا آتا ہے

مجھے ڈیفینس کی لنگوا‌ فرانکا نئیں آتی

تمہیں تو صدر کا قومی ترانہ آتا ہے

مجھے تو خیر زمیں کی زباں نہیں آتی

تمہیں مریخ کا قومی ترانہ آتا ہے