Rote Hain Sun Ke Kahani Meri, Urdu Ghazal By Imdad Imam Asar

rote hain sun ke kahani meri
kash sunte wo zabani meri

kaT gaya ghair mare nalon se
wah-ri saif-zabani meri

aaina dekh ke farmate hain
kis ghazab ki hai jawani meri

phir tumhein nind nahin aane ki
kahin sun li jo kahani meri

bar kiya panw teri mahfil mein
hai subuk tujh pe girani meri

hama-tan-gosh bane sunte hain
ghair kahta hai kahani meri

yaad aaunga jafa-karon ko
be-nishani hai nishani meri

iltija ek muqaddar do the
ghair ki mani na mani meri

hashr mein kuchh na hua mujh se sawal
wah-ri hech-madani meri

ab uThenge tere dar se mar kar
kabhi uThti nahin Thani meri

mere ashaar fughan-e-dil hain
qadr karta hai 'fughani' meri

KHusraw-e-mulk-e-suKHan-dani hun
dad hai baj-satani meri

dil mein poshida rahegi kab tak
aatish-e-shauq-e-nihani meri

tar-e-gesu se nazar ja uljhi
dekhna resha-dawani meri

dil ki haalat se KHabar deti hai
'asar' aashufta-bayani meri