Uss Ke Naam Jisse Tareeki Nigaal Chuki, Urdu Ghazal By Injila Hamesh

کون پڑھ سکتا ہے باطن کو

کون چھو سکتا ہے آنکھوں کی ویرانی کو

کون دیواروں پہ مرتی دھوپ کو اپنے اندر اتار سکتا ہے

جب حواس کوڑھ زدہ ہو جائیں

تب جدائی کے زخم سے من اجنبی ہو جاتا ہے

وہ میری آواز کے لمس سے بہت دور ہے

وہ کون سی بنجر زمین ہے

جہاں میرے کسی احساس کسی کیفیت کی رسائی نہیں ہوتی

بے تحاشا چیخ میرے اندر جمع ہے

محبت کس کس طرح سے مذاق بنتی ہے

خدا نے ہر بار میرے دل کو آزمایا

یہ میری خود کلامی ہے جو مجھے زندہ رکھے ہوئے ہے

ورنہ مجھے مارنے والوں نے

میرا امن خالی کر دیا تھا

اس نے خاموشی کو اپنا ہتھیار بنایا

اور اس ہتھیار سے

فریاد کرنے والے کی روح کو زخمی کر دیا

وہ جانتا ہے

تشدد کس کس طرح سے کیا جا سکتا ہے

وہ بے زار ہو گیا اس آواز سے

وہ بے زار ہو گیا اس آواز سے

جو روک رہی تھی اسے اندھیروں میں جانے سے

افسوس

وہ کھو گیا

اسے تاریکی نگل چکی ہے