Tumhaari Shaera Pagal, Urdu Nazam By Kanval Malik

tumhaari shaera pagal
hazaron sher likhti
nazm aur ghazlen kaha karti
hamesha sochti rahti
koi kaghaz ka TukDa DhunDhti aur dil ka sara haal likh deti
ki us ke pas to kitne hi lafzon ka zaKHira tha
siyahi sukh jati jab qalam KHamosh ho jate
to phir aansu syahi bante jate lafz kab KHamosh hote the
tumhaari shaera pagal
hazaron lafz le kar jab
tumhaare samne aati
tumhein jab ek nazar takti
to us ke lafz sare harf jumle sher nazmen aur wo ghazlen
tumhaari katthai aankhon mein kho jatin
anokhi chup si lag jati
tumhaari shaera KHamosh wapas lauT jati thi
na aansu bolte na lafz us ka sath dete the
tumhaari shaera pagal
kisi sakte mein rahti der tak
ta-der chup rahti
junhi bistar pe jati
ashk barish ban ke bah jate
wo sare lafz lauT aate
wo aansu chunti rahti aur
wo shab bhar karwaTen aur silwaTen ginti
subh tak sochti rahti
fajar tak lafz bunti harf chunti aur phir se jab
tumhaare samne aati
tumhein jab ek nazar takti
to us ke lafz sare harf jumle sher nazmen aur wo ghazlen
tumhaari katthai aankhon mein kho jatin
anokhi chup si lag jati
anokhi chup
qadam bojhal wo le kar lauT aati thi
yunhi har sal hota tha
tumhaari shaera pagal
tumhein takti to us ke lafz hi KHamosh ho jate
kabhi fursat mile tum ko to us ki nazm paDh lena
tumhaari shaera pagal