Sukhan Faham, Urdu Nazam By Kashif Aura

خاک کو جاتے فلک بات تو سن، سوچ ذرا

کون دے گا ترے ہاتھوں میں تسلی کے چراغ

کون کھینچے گا ترے ہونٹ سے نت تازہ غزل

کون چہرے کے ترے تل کو دیا بولے گا

تُو نے دنیا نہیں دیکھی تُو کہاں جانتا ہے

یہ زمانہ کئی باتوں کا برا مانتا ہے

اے پری وش تری زلفیں، ترے گالوں کی چمک

ترے ملبوس سے بنتا ہوا موسم کا سکوت

تری خوشبو سے نکلتی ہوئی نظموں کی قطار

تری آواز سے بنتی ہوئی سرگم کا سرور

تُو نے سوچا ہے کبھی آج بھی کیوں قائم ہے

تیرے شاعر کی زمینیں ہیں یا تُو دائم ہے

بیٹھ کے سوچ مرے دوست، مرے سبز چراغ

تُو کہ عادی ہے تکلم کا، قلم ہاتھوں کا

روٹھ جائے گا ہوس زادوں کی جو لغزش سے

کون کھینچے گا نئے شعر منانے کو تجھے

دنیا والے ہیں مری جان یہ ہم تھوڑی ہیں

خاک زادے ہیں سبھی اہل قلم تھوڑی ہیں

میرے چہرے پہ نمو پاتی ہوئی راکھ کو دیکھ

میرے الفاظ کو چھو، آ، مجھے سینے سے لگا

چھوڑ دنیا کو، زمانے کی ترقی کو، پلٹ

نئی نظموں کی زمیں بُنتے ہیں، مل بیٹھتے ہیں

ایک دوجے کو سخن فہمی عطاء کرتے ہیں

ایک دوجے کو محبت سے خدا کرتے ہیں