Daira, Urdu Nazam By Kashif Aura

زمیں پہ رہتے تمام لوگوں کی سوچ مہلت کا مرکزہ ہے

اداس صحرا کے زرد ٹیلے پہ ہنستے ہونٹوں سے پوچھ لو تم

یا خانہ کعبہ کو سرد آنکھوں سے تکتے مفلس سے پوچھ لو پھر

کہ پہلے دن سے صدائے کن سے وفا نبھانے پہ کیا ملا ہے

یہ کُن کی حرکت، خدا کی رحمت، حسین سپنے، نصیب، قسمت

جواب ہو گا کہ،

صرف دھوکا ہیں، دل لبھاتی کہانیاں ہیں

ہماری نظموں پہ داد دیتے حسین لوگو!

انہیں بتاؤ،

تمام رستے جو کامرانی کو جاتے لوگوں کا واسطہ تھے

انہی کے جیسے شریف زادوں کی تیز چالوں سے چھن گئے ہیں

خدا کی نعمت کے سبز تالے کی تنہا چابی

انہی کی نیت کے زرد جنگل میں کھو گئی ہے

اور ایسی نیت کے ساتھ ان کو خدائی چابی نہیں ملے گی

یہ سارے محور، تمام چکر انہی کے جیسے چلا رہے ہیں

جو حق کی رسی پہ پنجے گاڑے بتا رہے ہیں

یہ بھوک، روٹی، لباس، پانی حقیر قوموں کے مسئلے ہیں

یہ سارے جھوٹے ہیں زندہ رہنے کو فیک مصرع سنا رہے ہیں

یہ وقت ایسا نہیں رہے گا یہ وقت ویسا نہیں رہے گا

ہماری نظموں پہ داد دیتے حسین لوگو!

انہیں بتاؤ،

کہ مرکزے سے نکل کے دیکھیں

خدائی چابی تو سامنے ہے