Taaruf, Urdu Nazam By Maryam Tasleem Kiyani

یہ میں ہوں میں

جیسے آپ آپ ہیں

میں پیدا ہوتے ہی الجھن میں ہوں

اگر میں عشق ہوں تو فنا کیوں نہیں ہو جاتی

میں سمندر کی بیتاب لہر ہوں تو بہہ کیوں نہیں جاتی

میں رقص جنوں میں ہوں تو دیوانگی سر کیوں نہیں چڑھتی

بے چین روح ہوں تو جسم سے نجات کیوں نہیں پاتی

میں ڈرتی ہوں انسانی اشکال میں گھومتے بھیڑیوں سے

میں نفرت کی آگ میں جلے ہوئے دلوں سے خوف کھاتی ہوں

مجھے صحرا سے ڈر لگتا ہے

ویرانوں سے بھاگ آئی ہوں

زیست کی تمام تر رنگینیوں اور ان کی حقیقتوں سے آگاہی ہے

ہجوم دوستاں کے سرور میں بچکانہ کائنات بناتی ہوں

کبھی آئینہ رو نظر آتی ہوں

کبھی ہنستی ہوں خود اپنی نادانی پر

کبھی بے سبب اداس بہت ہوتی ہوں

کبھی سوچتی بے تحاشا ہوں

کبھی لکھتی ہوں ایسے کہ ہر لفظ روح کا درد اگل دیتا ہے

اور کبھی تمام کے تمام الفاظ کھو جاتے ہیں

بناوٹ اور دکھاوے ان کو نگل جاتے ہیں

میں کبھی بنجر ہوں اور کبھی جنم کو جنم دیتی ہوں

میں جذبوں خوابوں اور دعاؤں کو بہت سنبھال کے رکھتی ہوں

اور ان سے دھاگے لے کر خود کو بنتی ہوں

میں روشنی نہیں مگر میں تاریکی بھی نہیں

ایک شام کا سا ملگجا ہوں کبھی

تو کبھی دن کا دھندلکا ہوں

ایسی بہتی ہوئی ندی ہوں

جس کے کنارے کئی گیت

کئی نغمے مدھر تانوں میں لپٹے اترتے ہیں

میں زندگی کے سمندر کی تمام لہروں کو چھوتی ہوں

اور موتی موتی کہانیوں میں ٹانک دیتی ہوں

سچے سلمیٰ اور روپہلے گوٹے کی طرح

میں خواب جیتی ہوں

میں حقیقت کو پینٹ کرتی ہوں کہ میں حقیقت ہوں

اپنے ارد گرد ہر اچھی بری حقیقت کا حصہ ہوں

میں سر تا پا موم ہوں

ہر عام عورت کی طرح مجھے جو بنا دو میں بن جاتی ہوں

ہر ماحول میں ڈھل جاتی ہوں

مجھے برا سمجھا جائے تو بھی اچھا

اور اچھا سمجھا جائے تو بھی کیا برا !!!

یہ میں ہوں میں