KHanuman-soz Ma-siwa Hun Main, Urdu Ghazal By Meer Mehdi Majrooh

KHanuman-soz ma-siwa hun main
apne sae se bhi juda hun main

ghaur har chand kar raha hun main
par ye khulta nahin ki kya hun main

nahin is rah mein dusre ki khapat
aap hi apna rahnuma hun main

wo agar aa milen to kya hai ajab
gham se kuchh aur ho gaya hun main

dil hai shauq-e-gunah se labrez
dekhne hi ka parsa hun main

kyun na ho dar ka wo mustaujib
jo ki banda kahe KHuda hun main

soz-e-dil kar chuka hai jism ko KHak
ab tera muntazir saba hun main

har lab-e-zaKHm-e-tan se main dam-e-qatl
kahta qatil ko marhaba hun main

un sa maghrur aur pursish-e-haal
KHwab hai ye jo dekhta hun main

mujh sa hoga na saKHt-jaan koi
ki shab-e-hijr mein jiya hun main

meri pursish jo ki kisi ne to wo
bole han surat-ashna hun main

shaareh-e-haal-e-dil samajh mujh ko
dard hi dard ho gaya hun main

aankh tak Dalta nahin gahak
kuchh ajab jins-e-na-rawa hun main

roz-o-shab hai KHayal-e-kakul-o-zulf
kin balaon mein phans raha hun main

misl-e-nashtar hain KHar-e-sahrai
aur wahshat barhana-pa hun main

kal jo main ne kaha ki o be-mehr
dard-e-furqat se mar raha hun main

hans ke bole ye sab banawaT hai
aap ko KHub jaanta hun main

dikhne kya zaKHm-e-dil lage 'majruh'
hae hae jo kar raha hun main