Gulon Ko BaKHsh Ke ZaKHmon Ki Tazgi Maine, Urdu Ghazal By Mohammad Ishaq Afsar Afaqi

gulon ko baKHsh ke zaKHmon ki tazgi main ne
bahaar-e-murda mein ek jaan Dal di main ne

firaq-e-yar mein har sans umr-e-KHizr hui
hayat pai hai qismat se daimi main ne

jala ke apne hi hathon se tinke tinke ko
miTai baKHt-e-nasheman ki tirgi main ne

na jaane kaun si manzil hai dil ke pesh-e-nazar
ki KHak-e-alam-e-imkan to chhan li main ne

Tapak ke bah gae qalb-o-jigar bhi aankhon se
mazaq-e-girya ko samjha tha ek hansi main ne

sar-e-niyaz dar-e-naz se uTha na saka
ki ek sajde mein takmil-e-bandagi main ne

machal ke rah gae aaghosh-e-chashm mein aansu
taDap ke zabt-e-mohabbat ki dad di main ne

yahan to marg-e-musalsal se paD gaya pala
ilahi zindagi mangi thi zindagi main ne

na mil saka kahin matlub-e-bandagi 'afsar'
tajalliyat ki duniya bhi dekh li main ne