Waqt-e-aKHir Yaad Hai Saqi Ki Mehmani Mujhe, Urdu Ghazal By Muztar Khairabadi

waqt-e-aKHir yaad hai saqi ki mehmani mujhe
marte marte de diya angur ka pani mujhe

wo meri surat to dekhen apni surat ke liye
kash aaina bana de meri hairani mujhe

kaT gaya hai wasl se pahle zamana umr ka
hae dhoka de gaya bahta hua pani mujhe

daman-e-sahra se lunga mar ke wahshat mein kafan
ek naya joDa pinhaegi ye uryani mujhe

mere gul ko la ya apne phul le ja andalib
aise kanTon se nahin fansen nikalwani mujhe

tum agar chaho to miTTi se abhi paida hon phul
main agar mangun to dariya bhi na de pani mujhe

tishna-kaami is ko kahte hain ki bahr-e-ishq mein
main agar utrun to upar phenk de pani mujhe

aisi mushkil tum ne Dali hai ki jab mar jaunga
muddaton roya karegi meri aasani mujhe

tu ne itni di ki mai-KHwari ki hasrat bah gai
main ne itni pi ki aaKHir ho gai pani mujhe

rone jata hun main apni hasraton ke Dher par
be-kasi aa kar sikha de marsiya-KHwani mujhe

hashr mein chalna paDega ek TeDha rasta
kucha-e-jaanan sikha de Thokaren khani mujhe

'muztar' apne haq ke kanTe chun ke main ruKHsat hua
aur kya deti bahaar-e-gulshan-e-fani mujhe