Roshan Hai Mere Harf Ki Qandeel Falak Tak, Urdu Ghazal By Nasreen Syed

روشن ہے ، مرے حرف کی قندیل فلک تک

رہتی ہے ، دعاؤں کی جو، ترسیل فلک تک

مہتاب کی کرنوں سے ۔۔۔۔۔۔۔ سخن آئے نہا کر

دی جب بھی تخیل کو ۔۔۔۔۔ ذرا ڈھیل فلک تک

دل میں وہ خموشی ہے، کہ ہو دشت کو وحشت

وہ شور ہے ۔۔۔۔۔۔ جس کی نہیں تمثیل فلک تک

اک حبس تھا سینے میں، سو ہونا ہی تھا آزاد

اٹھا جو ۔۔۔۔۔۔۔۔ دھواں سا ، ہوا تحلیل فلک تک

تیری ہی اطاعت میں ۔۔۔۔ زمیں سجدہ کناں ہے

ہوتی ہے ترے حکم کی ۔۔۔۔۔۔۔۔ تعمیل فلک تک

کرتے ہیں جن و انس و پرند ، اس کی تلاوت

ہے قرآتِ قرآن کی ۔۔۔۔۔۔۔۔۔۔۔۔۔۔۔۔ ترتیل فلک تک

رکھتا ہے وہی تھام کے ۔۔۔ خیمے کی طنابیں

ہے دستِ زبر دست کی تحویل ۔۔۔۔۔۔۔ فلک تک

بے وزن دلائل سے ۔۔۔۔۔۔۔ کبھی بات بنی ہے؟

کیا کھینچ کے لے جاؤ گے تاویل فلک تک ؟

جب چاہوں ، کوئی رنج خزانے سے نکالوں

پھیلی ہے۔۔۔۔۔ تری یادوں کی زنبیل فلک تک

رکھی ہے سخن کی ابھی بنیاد ، زمیں پر

ہونی ہے ہنر کی ابھی تشکیل ، فلک تک

نسرینؔ ، دعاؤں میں اثر یوں ہی نہیں ہے

پہنچی ہے ترے درد کی تفصیل فلک تک