Zaban Se Nafrat Kyun, Urdu Nazam By Nazish Partap Gadhi

jahan bhi chhanun ghani ho qayam karte chalo
adab jahan bhi mile ehtiram karte chalo
har ek zaban ko yaro salam karte chalo
giroh ki hai na firqe ki aur na mazhab ki
zaban wirasat-e-insaniyat hai hum sab ki
zaban ke bab mein man aur tu ki had kaisi
koi zaban ho insan ko us se kad kaisi
zaban pak hai ganw ki goriyon ki tarah
zaban azim hai maon ki loriyon ki tarah

zaban tasalsul-e-tariKH-e-zindagani hai
zaban manazil-e-tahzib ki kahani hai
zaban bahte hue waqt ki rawani hai
nazar mein ho jo bulandi bhi aur wusat bhi
to har zaban mein ek husn bhi hai azmat bhi
wo raat ka hai pujari sahar ka dushman hai
jo hai zaban ka dushman bashar ka dushman hai

zamin ka husn hai kheton ki tazgi hai zaban
rahaT ki lai hai to panghaT ki ragni hai zaban
gali ka shor gharon ki hamahami hai zaban
junun-e-zist ki aahaT hai gungunahaT hai
zaban hayat ke honTon ki muskurahaT hai
fareb-o-maslahat-o-makr-o-rasmiyat nahin
riya ka zikr bayan-e-takallufat nahin
zaban ahl-e-siyasat ke bas ki baat nahin

zaban machalti hai miTTi pe chahchahon ki tarah
zaban nikalti hai chilman se zamzamon ki tarah
zaban ubalti hai aangan ke qahqahon ki tarah
zaban banti hai chaupal mein jawan ki tarah
zaban banti hai baiThak mein dastan ki tarah
zaban Dhalti hai bazar mein dukanon mein
zaban chalti hai kuchon mein kar-KHanon mein
zaban qadam-ba-qadam siDhiyon pe chaDhti hai
zaban pyar mohabbat se aage baDhti hai
na daftaron na kahin filon mein Dhalti hai
zaban dharti ke sine se lag ke chalti hai

zaban labon ka saliqa dilon ka nur bhi hai
zaban qaum ki izzat bhi hai ghurur bhi hai
zaban awam ki mehnat bhi hai shuur bhi hai
kisi shuur se aaKHir hamein adawat kyun
koi zaban ho insan ko us se nafrat kyun
zaban pak hai ganw ki goriyon ki tarah
zaban azim hai maon ki loriyon ki tarah