Duniya Mein Tere Nazneen Shahkaar Dekh Kar, Urdu Ghazal By Qazi Zaheer Ahmad

دنیا میں تیرے نازنیں شاہکار دیکھ کر

وہ آ گئے ہیں کوچہ و بازار دیکھ کر

اہلِ ہوس ضمیر کے مجرم بنے ہوئے

پاگل ہوئے تھے درہم و دینار دیکھ کر

تیری بہشت کے گل و گلزار دیکھ کر

وہ خوش ہوئے ہیں کچھ لب و رخسار دیکھ کر

چہرہ نہ کوئی نسبتِ معمار دیکھ کر

اجرت ملے گی کام کا معیار دیکھ کر

تسبیح کی، نہ ہی ورد کی رفتار دیکھ کر

بخشش کرے گا وہ ترا کردار دیکھ کر

ماں باپ تیرے اولیاء، ان سے دعائیں لے

مرعوب نہ ہو پیر کا دربار دیکھ کر

ہوتی نہیں ہے شیخ سے حوروں کی بول چال

وہ ڈر گئی ہیں جبہ و دستار دیکھ کر

اس پار تیری آخری منزل ہے منتظر

واپس نہ مڑ، یہ راستہ دشوار دیکھ کر

رستے میں کوئی عطر کوئی گل بچھا کے رکھ

وہ آ نہ جائیں حسرتِ دیدار دیکھ کر

سوکھے کھڑے ہوئے ہیں کوئی بولتا نہیں

پنچھی مڑے نہ حالتِ اشجار دیکھ کر

اس کے سرہانے دوست نہ اغیار دیکھ کر

دل رنج ہوا ہے حالتِ بیمار دیکھ کر

ہم نے انا کو پیس کر مٹھی میں رکھ لیا

ہم کو عطائے فضل کر مسمار دیکھ کر

اک نابغہِ وقت کئی تجربوں کے بعد

احمد ہوا ہے چپ پسِ دیوار دیکھ کر