Is Baat Ka Dekho Dhyan Rahe, Urdu Nazam By Rabia Barni

tum aksar kahte rahte ho
phulon ka kya hai
kuchh der mein murjha jate hain

aur ye raaten chandi si
do din ki kahani hai un ki
lamhon mein bikhar kar rah jati hai
moti ki tarah shabnam ki laDi

main aksar socha karti hun

kya mausam-e-gul hi sab kuchh hai
aur KHwab-e-bahaaran kuchh bhi nahin
billor se tarshi murat se alag
kya aks-e-nigaran kuchh bhi nahin
muTThi mein jo aa jae daulat hai
aur shauq tera wan kuchh bhi nahin

mahtab ki rangat dekhi hai
taron ki sajawaT dekhi hai
aur qaus-e-quzah ki rangini
ambar ki jabin par dekhi hai
nazron ka faqat dhoka hi sahi
lekin achchha lagta hai

tum apne KHayalon ke baadal se
anwar-e-sahar ko baatil Thahrao

andeshon ke tane bane se
KHushbu ko shikanjon mein kas do
taron ki qaba-e-zar dhundla do
mahtab ki kheti pamal karo

kis tarah basar hon sham-o-sahar
tarik hai shab mushkil hai safar
manzil ki nahin rahi ko KHabar

man mera viran sahi barbaad sahi
hai is se jhilmil rahguzar
KHushbu ke Dagar chandi ke nagar
giton ke shajar taron ke samar
palkon pe charaghan ka manzar

tum aah bharo bhi to dhire se
aisa na ho sab kuchh bujh jae
is baat ka dekho dhyan rahe