Jalan Dil Ki Likkhen Jo Hum Dil-jale, Urdu Ghazal By Rind Lakhnavi

jalan dil ki likkhen jo hum dil-jale
zaban-e-qalam mein paDen aable

rah-e-sab-e-ulfat mein ghabra na dil
bahut aise pesh aaenge marhale

na din wo tumhaare na apna wo sin
tumhaare hamare wo din sin Dhale

adam ki bhi kya rah hai be-nazir
chale jate hain pesh-o-pas qafile

wo ab nimcha kar chuke hain alam
ajal aa chuki sar pe kyun-kar Tale

Thahar ja koi dam ke mehman hain
KHabar le hamari chale hum chale

lakiren bhi miT miT gain hath ki
zi-bas hum ne dast-e-tassuf male

rahe dil ke arman sab dil mein haif
nikalne na pae mare hausle

baDa ho buDhape ka sab kho diya
na meri jawani na wo walwale

gaDa koi le kar dil-e-muztarib
mazaron mein aane lage zalzale

siyah-kariyon mein kaTi umr sab
qalam ki tarah sar ke bal go chale

mohabbat buton ki ye dil chhoD de
kisi tarah chhati se patthar Tale

shikayat ka mauqa na tha wasl mein
ki thi rah thoDi bahut the gile

koi dam mein hai naqsh-e-hasti fana
kidhar dhyan hai tera o bawle

kinar-e-lahad mein paDe hain wo aaj
jo aaghosh-e-madar mein the kal pale

gala tegh-e-qatil se ragDa kiya
na jhachka zara wah re manchale

na laya koi sham-o-gul gor par
lahad mein bhi dagh-e-mohabbat jale

chale bagh-e-hasti se hum na-murad
kisi rut mein ai gul na phule-phale

azal se hain ushshaq mazbuh-e-husn
jo manind-e-mahi kaTe hain gale

jo fariyaadi tere bhi aa nikle wan
zamin hogi mahshar ki upar-tale

jo abru ke honge ishaare yunhi
meri jaan lakhon kaTenge gale

kiye jae kawish palak yar ki
abhi dil ke phuTe nahin aable

sira mein na ghafil ho bandho kamar
chalo sath walo chalo hum chale

rahe mera jism-e-misali sahi
bala se ye putla saDe ya gale

ye sab sar-zamin fitna-angez hai
hazaron hi uThte hain yan ghalghale

nazar bhar ke phir dekh lun shakl-e-yar
jo aai hui meri dam bhar Tale

hamesha raha dagh dagh apna jism
sada misl-e-sarw-e-charaghan jale

falak ko milana tha gar KHak mein
to phir naz-o-neamat se kyun hum pale

rahe bar-war shaKH-e-naKHl-e-murad
ilahi hamesha to phule-phale

zamane pe afsurdagi chha gai
na hain ab wo charche na wo mashghale

musafir hun dilwaunga nazr-e-KHizr
jo tai honge raste ke sab marhale

lahu shab se aata hai ashkon ke sath
kaleje ke nasur shayad chhile

basar ho gai is tamanna mein umr
koi dost yak-rang mujh ko mile

ye kya rog ab ho gaya 'rind' ko
kai sal udhar tak the change bhale