Dilli Ki Bus, Urdu By Saghar Khayyami

thartharaati kanpti aai jo bus-stop par
chaDh gaya bonnet pe koi aur koi top par
suratan sajjan manush lekin nazar thi pap par
hashr ka hangam tha ghaalib the beTe bap par
karwaTon se bus ki bus mein aur halchal ho gai
dastan-e-ishq kitnon ki mukammal ho gai

ho gaya tha bhiD se har shaKHs bus mein chiDchiDa
ek hi bus mein khaDa tha shahr ka chhoTa baDa
jab koi andar ghisa to koi bahar gir paDa
chit paDa tha bus mein koi koi sar ke bal khaDa
yog ke jitne the aasan bas mein ek din ho gae
jeb mein rakkhe chane pis pis ke besan ho gae

aankh mein ek bar taswir-e-yatimi phir gai
main to andar ghus gaya chappal wahin par gir gai
sar se sarki ek Topi kis ke kis ke sar gai
zikr kya daman ka kije aastin tak chaDh gai
is qadar ragDi gai bilkul purani ho gai
gahri nili sherwani aasmani ho gai

gore gore surKH chehre pyas se murjhae the
saKHt garmi ke sabab bachche kahin chillae the
ek sahib bhiD mein kuchh is qadar ghabrae the
apni guddi jaan ke guddi meri khulae the
rafta rafta wo sarak ke pairahan mein aa gae
un ke munh ke pan tak mere dahan mein aa gae
tha yaqin dil ko mere sargarmi-e-raftar se
ja rahi hai dusri duniya mein wo sansar se
is qadar jhaTke liye us naznin ne pyar se
phans gai buDhe ki daDhi gesu-e-KHamdar se
jab break par panw mara accelerator chhoD kar
rakh diya kam-baKHt ne sab ka muqaddar phoD kar

haDDi haDDi ho gai thi aadmi ki chur chur
dekh ke haalat bus ke kah rahe the ba-shuur
didani hai kis qadar nazzara-e-hur-o-qusur
chhoD kar motor-nashini ek dafa dekhen zarur
jaante hain dosto! jin ki nazar barik hai
bus ke darwaza se jannat kis qadar nazdik hai