Kahun To Kya Main Kahun Pyari Pyari Aankhon Ko, Urdu Ghazal By Saghar Khayyami

kahun to kya main kahun pyari pyari aankhon ko
subu kahun ki surahi tumhaari aankhon ko

kuchh aisa chhaya hai dil par mere ghubar-e-alam
gulon ke sae bhi lagte hain bhaari aankhon ko

jhalak rahe hain wo palkon pe aansuon ki tarah
wo gham jo tum ne diye hain hamari aankhon ko

jhuken jo palken to ruk jaen dhaDkanen dil ki
uThen to chum len tare tumhaari aankhon ko

lahu gulon ka baha hai ba-surat-e-ansu
KHizan ne luTa hai jab bhi hamari aankhon ko

duaen karte hain nargis ke phul gulshan mein
nazar lage na kisi ki tumhaari aankhon ko

sulagti raat ke sine pe barf si rakh di
ghazal mein Dhaal ke goya tumhaari aankhon ko

mahakte phul sanakti hawa ye mausam-e-gul
chaman mein dekhte hain sab tumhaari aankhon ko