Ju Kinar E Ab E Rawan Basa Mere Sheheryar Ka Sheher Hai, Urdu Ghazal By Shahida Hassan

جو کنارِ آبِ رواں بسا،مرے شہریار کا شہر ہے

یہ ہے ایک خطہ جانفزا،کسی ذی وقار کا شہر ہے

یہ عجب مثال کا شہر تھا،کبھی یہ کمال کا شہر تھا

مگر اب برنگ ِملال یہ،غمِ بے شمار کا شہر ہے

اسے سوچتا ہی نہ تھا کوئی،اسے پوچھتا ہی نہ تھا کوئی

یہ جو اختیار کا شہر تھا،یہ جو اعتبار کا شہر ہے

یہاں اک ہجوم ہے بیکراں،یہاں سب کو چاہئے اب اماں

کہ یہ بے گھروں کا ہے سائباں،غمِ روزگار کا شہر ہے

یہاں بے یقیں سے جو لوگ ہیں،کسی انتظار میں مبتلا

یہ ہزیمتوں کے سفر میں ہیں کہ یہ انتشار کا شہر ہے

یہاں لوگ خوف سے مرگئے،یہاں خاندان اُجڑگئے

یہ ہے اشک وآہ کی رہگزر،دلِ بیقرار کا شہر ہے

یہاں بے دریغ جفا ہوئی،یہاں کربلا بھی بپا ہوئی

یہ گروہِ خیر کی قتل گہہ،یہ ستم شعار کا شہر ہے

یہاں رہبری کا فریب تھا،یہاں خوبیوں میں بھی عیب تھا

یہاں لمحہ لمحہ تضاد ہے کہ یہ نور و نار کا شہر ہے

یہ قدم قدم پہ مسابقت،یہ عداوتیں ،یہ مخاصمت

مجھے جانے کیوں یہ گُمان تھا،کہ یہ صرف پیار کا شہر ہے

یہاں عزتوں کے بھی نرخ ہیں،یہاں شہرتوں کے بھی دام ہیں

یہاں سب برائے فروخت ہے کہ یہ کاروبار کا شہر ہے

یہاں اُلفتوں کے سُبو بھی ہیں،یہاں ارد گرد عدو بھی ہیں

یہاں پھول بھی ہیں،ببول بھی،یہ گلاب و خار کا شہر ہے

یہاں فرصتوں کی ہیں قلّتیں،یہاں سب کو روز ہیں عجلتیں

یہاں گفتگو کو نہ طول دو کہ یہ اختصار کا شہر ہے

چلو اک دفینہ خواب کو کوئی حال دل کا سنائیں اب

ہے سپردِخاک کوئی یہاں،یہ کسی مزار کا شہر ہے