Hum Se Khushi Ka Bojh Uthaya Nahi Giya, Urdu Ghazal By Sheba Taraz

ہم سے خوشی کا بوجھ اُٹھایا نہیں گیا

یعنی کہ پھر حواس میں آیا نہیں گیا

نا چاہتے ہوئے مجھے رکھا تھا چاک پر

سیدھے سبھاوٴ چاک گھمایا نہیں گیا

خطروں سے کھیلتے رہے ہم عمر بھر مگر

دل سے ہمارے خوف کا سایہ نہیں گیا

مجھ کو بنایا خواب میں خاہش کو گھول کر

آنکھوں میں کوئی رنگ لگایا نہیں گیا

مر کر بھی سُر خرو ہوئیں میری ریاضتیں

مجھ کو کسی کٹہرے میں لایا نہیں گیا

بویا تھا جس نے جو بھی وہی کاٹنا پڑا

کوئی عمل کسی کا بھی ضائع نہیں گیا

بے چہرگی نے وقت کا یوں امتحاں لیا

آینے سے بھی نقش بنایا نہیں گیا

خوشیوں کی میز پر جو مرے دائیں بائیں تھا

غم آ پڑا تو دور تک پایا نہیں گیا

باہر نکل کے اس طرح پھیلا مرا وجود

پھر اپنے آپ ہی میں سمایا نہیں گیا

ہم کو وفا کا پاس تھا سو بزم میں تری

خود آ گئے ہیں ہم کو بلایا نہیں گیا