Masale Ka Hal Na Nikla Der Tak, Urdu Ghazal By Shyam Sundar Nanda Noor

masale ka hal na nikla der tak
raat-bhar jag bhi socha der tak

muskura kar us ne dekha der tak
dil hamara aaj dhaDka der tak

aap aae hain to ye aaya KHayal
baam par kyun panchhi chahka der tak

TuTte hi un se ummid-e-wafa
dil hamara phir na dhaDka der tak

phul apne ras se wanchit ho gaya
phul par bhanwra jo baiTha der tak

khul gaya us ki wafaon ka bharam
de na paya mujh ko dhoka der tak

naz se wo zulf suljhate rahe
chhat pe meri chand chamka der tak

jis jagah insan ki izzat na ho
us jagah phir kya Thaharna der tak

KHub roya main kisi ki yaad mein
ab ki baadal KHub barsa der tak

chal diya wo sab ko tanha chhoD kar
kash wo duniya mein rahta der tak

wo chhuDa kar apna daman chal diye
rah gaya main hath malta der tak

zahr se labrez saghar ka maza
pyar mein hum ne bhi chakkha der tak

ye zamana bewafa hai 'nur'-ji
kab kisi ka sath dega der tak