Ye Mat Samajh Ke Khel Hai Chak Aur Kumhar Ka, Urdu Ghazal By Syed Iqbal Rizvi Sharib

یہ مت سمجھ کہ کھیل ہے چاک اور کمھار کا

دنیا تو کاروبار ہے "کن" کی پکار کا

وعدہ جو مل گیا مجھے کوثر کی دھار کا

عالم نہ پوچھئے مرے بڑھتے خمار کا

ہم سب پہ لطفِ خاص ہے پروردگار کا

یہ سلسلہ جو جاری ہے لیل و نہار کا

موقع ہے یہ ستائشِ عالی وقار کا

جو ہے دھنی قلم کا بھی اور کارزار کا

کعبے کو اک درار نے مضبوط کر دیا

ورنہ درار کب ہے سہارا جدار کا

جنگِ احد ہو جنگ جمل یا کہ نہر واں

دستِ علی میں قصّہ ہے سب ذوالفقار کا

مرحب تھا پہلوان بہت نام ور مگر

حیدر کے سامنے تھا بھلا کس شمار کا

سورۃ بقر میں لکھ دیا خود الکریم نے

صدقہ دیا علی نے جو درہم چہار کا

لغزش کے واسطے ہیں کل اسباب ہر طرف

دے دے سرا امام کو اپنی مہار کا

مولا مریضِ عشق کو اب چین ہی نہیں

کیجے علاج کچھ تو دلِ بے قرار کا

فرقت کی شب طویل ہوئی مثلِ عمرِ خضر

کب ہوگا اختتام شبِ انتظار کا

راتوں کو اس مہینے کی ضائع نہ کیجئے

پھر سلسلہ نہ ہوگا غَمِ روزْگار کا

جب بو تراب آئیں گے بالیں پہ قبر میں

شارب کو ڈر ہی کیوں ہو کسی بھی فشار کا