Gham-e-ulfat Hai Sabab KHalq Mein Ruswai Ka, Urdu Ghazal By Syed Masood Hasan Masood

gham-e-ulfat hai sabab KHalq mein ruswai ka
nam badnam hua kyon shab-e-tanhai ka

TukDe TukDe hai jigar aap ke saudai ka
samna aaj bhi hai hashr mein ruswai ka

maut aati hai na imkan hai shakebai ka
aag lag jae bura ho shab-e-tanhai ka

dil ke TukDe na karo husn ki zinat hai yahi
aaina TuTa to kya lutf KHud-arai ka

paD gai ahal-e-qayamat ki gareban pe nazar
chhiD gaya hashr mein qissa meri ruswai ka

phir kashish ne dar-e-mahbub ki khincha dil ko
phir hua zauq hamein nasiya-farsai ka

ghaTti jati hai charagh-e-dil-e-sozan ki ziya
baDhta jata hai andhera shab-e-tanhai ka

kyon na insan ho mushtaq-e-tilism-e-duniya
dil bahalta hai tamashe se tamashai ka

chha gai zulmat-e-gham dil pe KHuda KHair kare
aa gaya chand gahan mein shab-e-tanhai ka

haalat-e-naza hai dam toD raha hai bimar
na-tawani mein ye aalam hai tawanai ka

kar chuke aap hamara dil-e-murda zinda
sath isa ke gaya daur masihai ka

aankh mein maut ki phir jati hai surat ab tak
ba-KHuda nam bura hai shab-e-tanhai ka

KHair itna to hua mashq-e-jafa se hasil
aa gaya tum ko saliqa sitam-arai ka

aaj hai kal se ghanimat ye suna jata hai
dur-az-haal mizaj aap ke saudai ka

le gaya husn-e-KHuda-dad buton ka 'masud'
maqdarat sabr ki imkan shakebai ka