Tawaf-e-kaba-o-but-KHana La-hasil Samajhte Hain, Urdu Ghazal By Syed Wajid Ali Farrukh Banarsi

tawaf-e-kaba-o-but-KHana la-hasil samajhte hain
jo apne dil ko husn-e-yar ki manzil samajhte hain

wo hi kuchh dard ko dard aur dil ko dil samajhte hain
kisi nakaam ki mushkil ko jo mushkil samajhte hain

harim-e-naz ka hota hai dhoka zarre zarre par
tere diwane har uftad ko manzil samajhte hain

hazaron jaan-sitan fitne liya karte hain angDai
teri masti bhari aankhon ko hum qatil samajhte hain

junun mein paikar-e-har-zarra hai saz-e-ana-laila
koi parda ho wahshi parda-e-mahmil samajhte hain

mohabbat mein jinhen har gam par hoti hai nakaami
wahi kuchh qadr-e-zauq-e-sai-e-la-hasil samajhte hain

na puchho kuchh ki hai sarf-e-KHalish kya chiz pahlu mein
sab is ko dard kahte hain hum is ko dil samajhte hain

mohabbat be-niyaz-e-kaif-e-wasl-o-hijr hoti hai
ise kya bul-hawas samjhega ahl-e-dil samajhte hain

nazar pahunchi kahan allahu-akbar tere kushton ki
ki apne hi ko apna hashr mein qatil samajhte hain

musibat maya-e-rahat hai arbab-e-mohabbat ko
haqiqat-ashna girdab ko sahil samajhte hain

taDap kar jaan de dena jo sach puchho to aasan hai
mohabbat mein magar jine ko hum mushkil samajhte hain

usi par barishen hoti hain anwar-e-tajalli ki
jise wo iltifat-e-naz ke qabil samajhte hain

haqiqat mein unhin ki zindagi hai zindagi 'farruKH'
ajal ko hasti-e-fani ka jo hasil samajhte hain