Ramzan Ul Mubarak By Haider Abbas

ماہ و برس کے حسین چکر میں اک مہینہ

کہ جس کو رمضان بولتے ہیں

یہ وہ مہینہ ہے جس کے لمحوں

کی مسکراتی ہوئ جبیں پر

نقوشِ قرآن بولتے ہیں

یہ وسوسوں کی کریہہ رت سے بعید تر ہے

تمام ایقان بولتے ہیں

یہ وہ مہینہ ہے جس کی عظمت

درود کے آئینوں کی شفاف دلکشی ہے

عبادتوں کے سخن سناتے ہوئے مراحل کی زندگی ہے

کہ اس کے پرچم تلے بشر کو

کہاں کہیں کوئ بے کلی ہے

یہ وہ مہینہ ہے جس کی آرائشوں سے مس ہو کے

ہر مقدر سنور رہا ہے

اسی کے مرہم کا لمس پا کر

گناہ گاروں کا زخم پل بھر میں بھر رہا ہے

افق سے جس کے صباحتوں کا نفیس سورج

ابھر رہا ہے

یہ وہ مہینہ ہے جس میں قرآں

اتر رہا ہے

یہ وہ مہینہ ہے جس نے کھولا کہ مقصدِ کائنات کیا ہے

اجل کی منہ زوریوں سے ٹکرا کے گیت گاتی حیات کیا ہے

کدورتوں کو شکست سے روشناس کرتا

ہوا دل۔التفات کیا ہے

اسی نے عقدہ کشاء کیا ہے

کہ صوم کیا ہے صلوٰۃ کیا ہے

بروزِ محشر نجات کیا ہے

یہ وہ مہینہ ہے جس کی بخشش کے معجزوں میں

نصابِ تیرہ کے سارے اوراق روشنی کے

کرن قرینوں کی ضرب کھا کر کچھ ایسے ہو منتشر گئے ہیں

کہ جنسِ ابلیس کے سبھی بھاؤ گر گئے ہیں

یہ وہ مہینہ ہے جس کے اندر خدائے واحد

سبھی اوامر سبھی نواہی کے ضابطوں کا

مزاج ترتیب دے رہا ہے

ضمیر پرور بلندیوں کی

بشر کو تہذیب دے رہا ہے

اسی مہینے کو نوعِ انساں

پہ موجد۔بحر و بر کا احسان بولتے ہیں

اسی کو رمضان بولتے ہیں