Nazm By Kafeel Rana

"ناٹک"

سکوت ایسا کہ شبد کی سنسناتی آوازیں

کھا چکا ہے

سپاٹ چہروں کے

خالی پنے یہ بولتے ہیں

کسی حسن نے

کئی برس سے کوئی بھی" کوزہ "نہیں بنایا

کسی قلم نے

برہنہ جسموں کے اونچے ٹیلوں سے

عین نیچے سڑکتی انگلی کو قید کر کے

وہ "کالی شلوار "کھول دی تھی

کوئی لکھاری بدن کے اندر

مچلتے خلیوں کے سارے

عقدوں کو فاش کرتے ہوئے بتاتا

کہ کیسے وہ سارے لال خلیے بہت سے

"راجہ گدھوں" نے اپنے وجود مایہ کی مائیگی سے

شکستہ جسموں میں جب اتارے

تو تب بھی چہروں پہ خامشی تھی

جمود کے اس طویل سر پر

کوئی مسافر

کھنکتے گھنگھرو کی چھن چھنن پر

یوں سر کو دھنتا کہ جیسے منزل کے سارے رستے

جوان" امراؤ "کے بدن سے نکل رہے ہیں

کتاب وحشت کو چپ کراؤ

وہ چیختی ہے

کہاں گیا وہ امیر خسرو

جو اپنے اندر کی وحشتوں کو

"سروں" کا شستہ لباس دے

کر برہنہ تالوں سے جا ملاتاکہ جنکی آغوشِ بے فغاں میں کئی برس کے سسکتے نوحے تڑپ رہے ہیں

وہ سارے نوحے

کہ جو صلیب سکوت جاں پر ہی مر رہے ہیں

مگر صداؤں کو خامشی کے

تباۃ شہروں سے ڈھونڈ لانا ہی تو ہنر ہے

یہی تو" ناٹک" ہے

جو ازل سے ہر ایک فنکار کر رہا ہے

سومیری آنکھوں میں

لمبی راتوں کی خامشی ہے

تو میں اگر کوئی نظم لکھوں

جو سانحہ ہو

کہ جس سے حلقوم چیخ اٹھیں

سکوت محفل کو توڑ ڈالیں

تو داد دو گے؟ ؟

کفیل رانا