Gazal By Mujahid Hadi Ilolvi

غزل

یہ پوچھ شاہ زمن سے سلامتی کیا ہے

زمانہ اندھوں سے پوچھے ہے روشنی کیا ہے

یہ تخت و تاج بھی تاراج تیرا کردے گی

کہاں پتہ ہے تجھے آنکھوں کی نمی کیا ہے

لگے ہیں تم کو جو معصوم ظالم و جابر

تو پھر لغت میں تمہاری درندگی کیا ہے

ادائیں تیری لبھاتی بھی ہیں ڈراتی بھی

تو ہی بتادے ستم کیا ہے عاشقی کیا ہے

قلم تو جیب میں سونے کا ہے تو کیسا فقیر

تو یہ بتا ہمیں مفہومِ مفلسی کیا ہے

جو تشنہ کام ہی بیٹھا ہے میکدے میں بھی

وہ جانتا ہے کہ تکلیفِ تشنگی کیا ہے

حسین خواب ہیں کچھ ٹھوکریں ہیں اور کچھ غم

بتاؤ مجھ کو سوا اس کے زندگی کیا ہے

غرور علم پہ اس درجہ بڑھ گیا تجھ میں

سوال چاند سے کرتا ہے چاندنی کیا ہے

بیان سے نہیں کردار سے زمانے کو

بتاؤ شیر کی اک لمحہ زندگی کیا ہے

قدم قدم پہ تو لُوٹے ہے قافلہ اپنا

یہی ہے رہبری تیری تو رہزنی کیا ہے

ہمارے گھر میں ہی رہتا ہے چاند مدت سے

ہمیں کہاں سے پتا ہوگا تیرگی کیا ہے

ہے ان کا راج مگر پھر بھی ہارے ہیں دلی

امیر شہر سے پوچھو کہ بے بسی کیا ہے

قدم قدم پہ رفیقوں نے ظلم ڈھائے ہیں

ستم ظریف رقیبوں کی بات ہی کیا ہے

مکینِ شہرِ خموشاں سے پوچھ لو ہادؔی

پتا چلے گا حقیقت میں زندگی کیا ہے

شاعر: مجاہد ہادؔی ایلولوی

گجرات انڈیا