Sar Phiri By Noor Ush Shaoor

کوئی اس سے پوچھے تو، اتنی سر پھری کیوں ہے

سرخ گہری آنکھوں میں، کس کے خواب کا خوں ہے

یہ صبیح چہرہ کیوں اس قدر ہے سنجیدہ

گویا دل میں ہے کوئی گہری سوچ پوشیدہ

زیادہ بات کرنے سے کس لیے وہ ڈرتی ہے

کتنے راز ہونٹوں کے بیچ لے کے پھرتی ہے

گفتگو دلیلوں سے، تجربہ حوالوں میں

کتنی صدیاں دیکھی ہیں اس نے بیس سالوں میں

نیم اندھیرے کونوں سے، کیوں اسے محبت ہے

زخم زخم سانسوں میں کس طرح کی وحشت ہے

خوابگاہ پھولوں کی، کرچیوں کا درپن ہے

اس کے نرم ہاتھوں میں ایک کھردرا پن ہے

کیوں ہے اس کے لہجے میں اتنی گہری خاموشی

کیا سنا ہے اس نے جو اوڑھ لی ہے خاموشی

بے دریغ باتوں سے خود کو روکتی کیوں ہے

اس عمر میں آخر وہ اتنا سوچتی کیوں ہے

حرف میں حرارت ہے، سوچ میں ہے زرخیزی

اس نے جھیل رکھی ہے اک صدی کی خونریزی

ڈیل ڈول نازک سا، چال خوب پھرتیلی

سخت جان ہڈی پہ جلد ہے ملائم سی

وہ فضول باتوں کو اہمیت نہیں دیتی

بار بار کیوں اپنی سیلفی نہیں لیتی

ہر نئی ٹرینڈنگ کا، کچھ جنوں نہیں اس کو

بے پناہ شاپنگ کا شوق کیوں نہیں اس کو

دوستوں سے کیوں اپنی الجھنیں چھپاتی ہے

غم کی داستاں سب کو کیوں نہیں سناتی ہے

کون امر مانع ہے وقت یوں گنوانے سے

بچ رہی ہے کیوں جھوٹے قہقہے لگانے سے

کیوں نہیں اسے رغبت کامیڈی ڈراموں سے

اک گھڑی نہیں فرصت، عشق اتنا کاموں سے

کام کر کے تھکتی ہے، خود کما کے کھاتی ہے

گفٹ کیوں نہیں لیتی، قرض کیوں چکاتی ہے

کیا وہ بچپنے سے ہے شاہ زاد فطرت کی

کیوں نہیں اسے حسرت، تاجِ بیش قیمت کی

اس طرح سے جینے میں عار کیوں نہیں اس کو

رنگ رنگ دنیا سے پیار کیوں نہیں اس کو

اک نگاہ میں کیسے نیتیں پرکھتی ہے

قرب کے سبھی امکاں، فاصلوں میں رکھتی ہے

دہر کے تماشے یوں لگتے حقیر اس کو

کوئی کر نہیں سکتا، دام میں اسیر اس کو

اس کے کان شہدا کا ذکر جب بھی سنتے ہیں

جھیل سی ان آنکھوں میں دیپ کیسے جلتے ہیں

دھیمے سرد لہجے میں آگ کیوں سلگتی ہے

با وقار پیشانی کس لیے دہکتی ہے

گفتگو میں انگارے کس لیے لپکتے ہیں

آنکھ میں یہ تاروں سے اشک کیوں دمکتے ہیں

کھل کے کیوں نہیں ہنستی، کتنا رو چکی ہے وہ

ڈھونڈتی ہے وہ کس کو، کس کو کھو چکی ہے وہ

وہ تو اک پہیلی ہے، کوئی اس کو بوجھے تو

اتنی اجنبی کیوں ہے کوئی اس سے پوچھے تو