Murshid Aur Main By Tariq Ahmad Tariq

ارے مرشد تو چاہتا ہے

کہوں میں حالِ دل اپنا

بھلا میں طفلِ ناداں ہوں

مری کیا داستاں ہو گی

مرے بچپن کی سوغاتیں

فقط کچھ بے تکی باتیں

دسمبر کی وہ برساتیں

نفاست سے بھری راتیں

بھلا میں کیسے بولوں گی

زباں میں کیسے کھولوں گی

مرا گستاخ لہجہ تو

مری کشتی ڈبوئے گا

ارے مرشد تو کہتا ہے

مخاطب تجھ سے ہو جاؤں

میں کہتی ہوں ضرورت کیا

کوئی رشتہ بنانے کی

تعلق کو نبھانے کی

کہانی میں سمانے کی

مری مصروف دنیا میں

کسی کو یوں بلانے کی

گنجائش ہو تو ہو لیکن

یہ خواہش ہی نہیں بنتی

اگر میں سوچ کی سرحد

پھلانگوں تو میں مر جاؤں

مرے خوابوں کی شادابی

تمناؤں کی ہریالی

سبھی کی دسترس سے دور

رہے مرشد تو اچھّا ہے

ارے مرشد مری باتیں

مری خود سے ملاقاتیں

میں ہونٹوں پر نہیں لاتی

کسی کو کہہ نہیں پاتی

دھندلکوں میں ہی بیٹھی ہوں

میں خود کو یوں سمیٹی ہوں

میں اپنی بے زُبانی پر

نہایت معذرت خواں ہوں

ارے مرشد تو چاہتا ہے

کہ میں تجھ جیسی بن جاؤں

میں حکمت سے لپٹ جاؤں

مشقّت میں میں پڑھ جاؤں

تدبّر اور تفکّر کے

سبھی اسباق پڑھ آؤں

فِراست کے سمندر سے

صدف کچھ ڈھونڈ کر لاؤں

اندیشوں کی ہر اک وادی

سے آگے کا سفر کر لوں

پرندوں کی طرح میں بھی

فضاء میں پنکھ پھیلاؤں

مرے افکار کا آنچل

تخیّل کی گھنی چادر

تذبذب اور اندیشوں سے

بہت ہی دور لے جاؤں

مگر یہ بات بھی سچ ہے

بصد آداب سن مرشد

ہماری عمر میں اکثر

بڑے لوگوں کی یہ باتیں

کسے محبوب ہوتی ہیں

بہت معیوب ہوتی ہیں