Woh Ek Masoom Larki Thi By Tariq Ahmad Tariq

وہ اک معصوم لڑکی تھی

جو سہمی سہمی رہتی تھی

نہ جانے کن سوالوں میں

وہ اکثر الجھی رہتی تھی

بظاہر تھی وہ سنجیدہ

بدن اس کا تھا لرزیدہ

بہت شرمیلی دوشیزہ

سبک رفتار نم دیدہ

وہ اک دن روبرو بیٹھی

کہ جیسے ہو میری بیٹی

بڑے ہی شوق سے اپنی

کتابیں کھول کر رکھ لی

میں جب بھی بول پڑتا تھا

ہمہ تن گوش رہتی تھی

بسا اوقات وہ میری

تلخ باتوں پہ ہستی تھی

پھر اپنی سہیلیوں سے وہ

مرے بارے میں لڑتی تھی

بڑی محتاط ہو کر وہ

خیالوں کو پرکھتی تھی

میں جب بھی کچھ پڑھاتا تھا

اسے خوشحال پاتا تھا

صدا آئی مرے دل سے

ملی ہے وہ مقدر سے

ارے طارق، او ہرجائی

یہی ہے تیری پرچھائی

بنا وہ چاند سا مکھڑا

ہماری جان کا ٹکڑا

میں نے استاد کی سیڑھی

پھلانگی اور یہ کہہ ڈالا

مری فکر و ہنر تم ہو

مری لخت جگر تم ہو

مگر اس نے نہ کچھ بولا

نہ ہاں کی اور نہ منہ کھولا

خموشی کی رِدا اوڑھی

سہیلی کی طرف دوڑی

مری وہ لاڈلی بیٹی

مری آنکھوں کی ٹھنڈک تھی

جسے دل میں بسایا تھا

جتن کر کے ہنسایا تھا

اور اس کو روبرو پا کر

میں کچھ دن مسکرایا تھا

مری دھڑکن وہ بن پائی

مری روح میں سمٹ آئی

مرے سانسوں میں بستی تھی

تصور میں مہکتی تھی

خیالوں میں وہ آئی تھی

بنِا دستک سمائی تھی

مری نظروں کی محور تھی

وہ پریوں سے بھی بڑھ کر تھی

اچانک اس کی خاموشی

بنی اک روز سرگوشی

سلیقے سے یہ کہہ ڈالا

نہایت معذرت خواہ ہوں

بہت ممنون ہوں تیری

مگر یہ بات ہے گہری

فقط اپنے ابا کی ہوں

بلاشک لاڈلی بیٹی

ہوں اپنی ماں کی شہزادی

مری ماں میری دنیا ہے

مری ماں میری جنت ہے

میں اس جنت کی بیٹی ہوں

فقط اس کی ہی بیٹی ہوں

فقط اس کی ہی بیٹی ہوں

بالاخر میں نے جانا ہے

تدبّر کر کے مانا ہے

کوئی استاد کتنا ہی

شفقت کا مجسم ہو

محبت کا پیمبر ہو

صداقت کا بھی پیکر ہو

شرافت کا سمندر ہو

مقدّر کا سکندر ہو

مگر رتبے میں پھر بھی وہ

سگے رشتوں سے کم تر ہے

مری منہ بولی بیٹی نے

یہ دانائی اُگل ڈالی

مجھے آخر وہ سمجھایا

جو اب تک میں نہ سمجھا تھا

کہ وہ معصوم سی لڑکی

مری کچھ بھی نہیں لگتی

جسِے پرچھائی سمجھا تھا

وہم تھا اور اندیشہ تھا