Be-mani, Urdu Nazam By Vaqar Khaleel

saDak par rail tezi se chali hai
hawa dekho to pani se jali hai
kaha murghe ne ye gidaD se ro kar
meri murghi abhi uThi hai so kar
nadi mein tairta KHargosh dekha
to machhli ne paron ko KHub senka
kabutar se hui kachhwe ki shadi
to bhaalu ne TamaTar ko dua di
machaya shor kuchh sanpon ne aisa
chalaya bakron ne jo khoTa paisa
jalebi tairti pani pe aati
maze le le ke wo bhinDi ne khai
gadhe cycle chalae ja rahe the
maze se dudh khana kha rahe the
sar-e-rah piT gai chyunTi bichaari
gilahri ban gai ab to shikari
thapak kar main ne miThe ko jagaya
andhere mein namak ne gungunaya
falak par uD raha tha ek hathi
miyan ghoDe chale hain ban ke sathi
azan bakri ne di naddi pe ja kar
miyan machchhar nikal aae naha kar
mili chuhe ke bil se ek billi
shri ga ga bane hain shaiKH chilli
maze se ghas bandar kha raha hai
chaba kar pan kawwa aa raha hai
gira pani ke nal se ek anDa
to KHarbuza uTha phir le ke DanDa
sada ye ghaib se ek bar aai
zamin-o-asman mein hai laDai