افغانستان اور وسط ایشیاء سے کپاس درآمد کا فیصلہ ملکی مفاد کے مطابق ہے

کراچی۔ (اُردو پوائنٹ اخبارتازہ ترین - اے پی پی۔ 06 جنوری2020ء) فیڈریشن پاکستان چیمبر آف کامرس اینڈ انڈسٹری (ایف پی سی سی آئی) کے صدر میاں انجم نثار نے کہا ہے کہ ملک میں کپاس کی کمی کو پورا کرنے اور ٹیکسٹائل کی اہم صنعت کو رواں رکھنے کے لئے بھارت کے بجائے طورخم کے راستے افغانستان اور وسط ایشیاء سے کپاس درآمد کرنے کا فیصلہ ملکی مفاد کے عین مطابق ہے جس کی بھرپور تائید کرتے ہیں۔

میاںانجم نثارنے بزنس کمیونٹی سے گفتگو میں کہا کہ پاکستان کپاس برآمد کرنے والے ملک سے کپاس درآمد کرنے والا ملک بن چکا ہے اور سال رواں میں کم از کم 50 لاکھ گانٹھ کپاس کی ضرورت ہے جس کی قیمت کم رکھنے کے لئے کپاس کی درآمد پر عائد تمام ٹیکس اور ڈیوٹیاں ختم کر دی گئی ہیں جس سے حکومت کو محاصل کی مد میں نقصان ہو گا تاہم ملک کو برآمدات کی مد میں فائدہ ہو گا۔

(جاری ہے)

فیصلے میں مقامی کاشتکاروں کے مفادات کا خیال رکھتے ہوئے درآمد کی اجازت 15جنوری سے دی گئی ہے تاکہ مقامی فصل فروخت ہو چکی ہو اور کاشتکاروں کو درآمد شدہ کپاس کے معیار اور قیمت سے مسابقت نہ کرنی پڑے۔ پاکستان بزنس مین اینڈ انٹلیکچولز فور م وآل کراچی انڈسٹریل الائنس کے صدر اور بزنس مین پینل کے سینیئر وائس چیئرمین میاں زاہد حسین نے کہا کہ ویلیو ایڈڈ ٹیکسٹائل کی برآمدات میں اضافہ ہو رہا ہے اور کپاس درآمد کرنے کے فیصلے سے اس کے تسلسل میں رکاوٹ کے اندیشے ختم ہو گئے ہیں۔

انہوں نے کہا کہ ملکی معیشت میں اہم ترین کردار ادا کرنے والی کپاس کی فصل مسلسل زوال پذیر ہے جس کا سبب غیر معیاری بیج، جعلی زرعی ادویات، پانی کی کمی، مداخل کی بڑھتی ہوئی قیمتیں، موسمیاتی تغیر، فی ایکڑ پیداوار میں مسلسل کمی اورکاشتکاروں کا گنے کی فصل کی جانب مائل ہونا شامل ہے۔ جس سے کاٹن کی تجارت سے وابسطہ صنعتکاروں اور تاجروں کو خاصے نقصانات کا سامنا کرنا پڑرہا ہے۔

حکومت کو چاہئے کہ ہنگامی بنیادوں پر ایسے اقدامات کرے جس سے کپاس کی پیداوار بڑھے اور اگر برآمدات نہ ہو سکیں تو کم از کم ملکی ضروریات ہی پوری کی جا سکیں تاکہ کاروبار اور روزگار بڑھے، سب سے زیادہ زرمبادلہ کمانے والا شعبہ فعال ہو سکے، برآمدات میں اضافہ اور عوام کو روزگار میسر ہو۔ ٹیکسٹائل کی صنعت کو بھی اپ گریڈ کر کے بین الاقوامی معیار کے مطابق لانے کی ضرورت ہے تاکہ بین الاقوامی منڈی میں مسابقت کی صورتحال بہتر ہو سکے۔

میاں زاہد حسین نے مزید کہا کہ ایف پی سی سی آئی کے نو منتخب صدر میاں انجم نثار کی قیادت میں حکومت کوکپاس اور زراعت کے شعبے پر فوری اور خصوصی توجہ دلانے کیلئے اقدا مات کے ساتھ تاجروں و صنعتکاروں کے نقصانات کا ازالہ کروانے کی ہر ممکن کو شش کرے گی۔