Waqfa Dunya Main Ane Or Dunya Se Jane K Beech, Urdu Ghazal By Abdul Salam Bengluri

وقفہ دنیا میں آنے اور دنیا سے جانے کے بیچ

کاٹو جیسے چاہو غم کھانے یا خوشیاں لٹانے کے بیچ

فیصلہ جب بھی کرنے بیٹھا چھوڑدوں یا حاصل کرلوں

دل نے پو چھا فرق ہے کتنا کھونے اور پانے کے بیچ

کتنا مشکل ہے صاحب رشتوں کو بھی تھامے رکھنا

اپنے لب پر قابو رکھنا سننے اور سنانے کے بیچ

بھول کے سارے وعدے تم نے ملنا جلنا چھوڑ دیا

تم کیا جانو کیسا لگتا ہے لوگوں کے یاد دلانے کے بیچ

کتنے مراحل طے کرتا ہے دل کے اندر بیٹھا درد

نام ہمارے ریتی او پر لکھنے او ر مٹانے کے بیچ

تجھ سے پہلے تیرے بعد کوئی نہیں تھا کوئی نہیں ہے

شامِ فرقت میں ہوں تنہا یادوں کے غم خانے کے بیچ

کھلنے کو بیتاب ہیں کب سے غنچے، بوٹے، کلیاں، پھول

آ جا اب تو جانِ خیاباں اِس دل کے ویرانے کے بیچ

صورت سیرت دونوں اچھّی لیکن یہ نخوت کی ادا

اپنی انا کو کیسے روکوں اُن کے حکم سنانے کے بیچ

برسو ں بیتے کٹ نہیں پایا فاصلہ تھوڑی دوری کا

کتنے قدم ہیں میرے گھر سے ان کے دولت خانے کے بیچ

بیچ ہمارے دنیا والے کیوں آئے تھے سمجھانے

اتنا تو ہم کاش سمجھتے ان کے سمجھانے کے بیچ

چھیڑ کروں میں اگلوں سے توبہ میری کیا اوقات سلام

سوچا اپنا ناپ بھی لے لوں میر کے پیمانے کے بیچ