Dil Ko LaTka Liya Hai Gesu Mein, Urdu Ghazal By Agha Hajju Sharaf

dil ko laTka liya hai gesu mein
jab wo baiThen hain aa ke pahlu mein

DabDabaate hi aankhen pathrai
kya hi hasrat bhari thi aansu mein

sar-kashi ki jo bu-e-gesu ne
chhup raha mushk naf-e-ahu mein

zindagi bhar karenge us ki talash
chal basenge isi takabu mein

dard-e-dil rui se na sekwana
aag hai is taraf ke pahlu mein

kaun kahta hai KHal-e-mushkin hai
dil hai kisra ka taq-e-abru mein

bazm mein un ki jab gae hain hum
itr bhar bhar diya hai chullu mein

bulbulon mein hamara dil hoga
ruh hogi gulon ki KHushbu mein

dil to tha iKHtiyar se bahar
ab jigar bhi nahin hai qabu mein

bahr-e-gham mein marenge Dub ke hum
qabr ek din banegi Tapu mein

KHun rulati hain ankhDiyan teri
ek hi hain ye donon jadu mein

huren passang ki karengi hawas
mil wo baiThenge jis taraazu mein

kis ko ghash aa gaya jo chiDkoge
kyun bhara hai gulab chullu mein

aalam-e-wajd dil ko rahta hai
mast hain nara-ha-e-yahu mein

ai 'sharaf' jab maza hai rone ka
niklen laKHt-e-jigar bhi aansu mein