Zimedari, Urdu Nazam By Asna Badr

ماں بیٹے کے درمیان ایک منظوم مکالمہ

بیٹا

بس بہت پڑھ لیا کچھ بھول نہیں جاؤں گا

ماں میں بس آج سے اسکول نہیں جاوں گا

ماں

میرے بیٹے مرے معصوم سے پیارے بچے

روز اک تازہ بہانہ نہیں کرتے ایسے

اچھا مجھ کو یہ بتاؤ ہے پریشانی کیا

تم کو اچھی نہیں لگتی کوئی استانی کیا

کون سی بات سے جھنجھلائے ہوئے رہتے ہو

یوں جو اسکول سے اکتائے ہوئے رہتے ہو

بیٹا

یوں تو بچوں سے ہے اسکول کا ہر کلاس بھرا

لیکن ان میں نہ کوئی دوست مرا یار مرا

ایک بھی میری توجہ نہیں حاصل کرتا

اپنی باتوں میں کوئی بھی نہیں شامل کرتا

میں نے دیکھا ہے چلے جاتے ہیں سب دیکھتے ہی

میری موجودگی جیسے کہ مصیبت ہے کوئی

سارے ٹیچرس بھی رہتے ہیں بہ ہر حال خفا

میں کسی وقت انہیں خوش ہی نہیں کر پاتا

اک نہ اک بات پہ کرتے ہیں وہ ہر روز جرح

وہاں کوئی بھی نہیں تیری طرح میری طرح

ماں

میرے بیٹے تمہیں اسکول تو جانا ہوگا

جو خفا ہیں انہیں ہر روز منانا ہوگا

بیٹا

ماں بھلا کیوں میں یہ روزانہ کی تکرار سہوں

کیوں بھلا روٹھے ہوئے لوگوں کے ہم راہ رہوں

ماں

سب کو خوش رکھنا کسی کے لیے آسان نہیں

میں سمجھتی ہوں کہ اس کا کوئی امکان نہیں

لیکن اسکول تو پابندی سے جاؤ بیٹے

ذمہ داری جو ملی اس کو نبھاؤ بیٹے

کیوں کہ تعلیم تمہارے لیے ہے کچھ اور ہے اب

میرے ہر روز جگانے کا ہے کچھ اور سبب

اک طرف اپنا یہ الجھا دل ناشاد رکھو

تم پرنسپل ہو یہ اک بات سدا یاد رکھو