Hijab, Urdu Nazam By Azeez Belgaumi

حجاب وجہِ سکوں، وجہِ زیب و زینت بھی

حجاب ضامنِ عزت بھی، نورِ طلعت بھی

حجاب رحمت و برکت بھی، وجہِ عفّت بھی

حجاب باعثِ نصرت بھی، نورِ وحدت بھی

حجاب مظہرِ غیرت بھی، مثلِ خلعت بھی

حجاب جانِ محبت بھی، رُوحِ اُلفت بھی

حجاب زیست میں پاکیزگی کی نیت بھی

حجاب طاقتِ فکر و عمل بھی، سیرت بھی

حجاب ذہن کی رفعت، دِلوں کی فرحت بھی

حجاب باغِ اِرم کی جہاں میں نِکہت بھی

حجاب سنتِ نبوی بھی، اُن کی قربت بھی

حجاب دستِ نبی پر ہے گویا بعیت بھی

حجاب نعمتِ ربی بھی، گھر کی عزت بھی

حجاب مثلِ عبادت، نبی کی طاعت بھی

سروں پہ زن کے یہ اصلاً، خدا کی رحمت بھی

حجاب کرتا ہے ظاہر، نبی سے نسبت بھی

یہ بے حیاؤں کی خاطر ہے ایک آفت بھی

حجاب منکرِ دیں کے لئے ہے لعنت بھی

پسند کرتی نہیں بے حجابی، فطرت بھی

حجاب مومنہ عورت کے دِل کی وسعت بھی

حجاب سے یہ تنفر ہے، وجہِ ذلت بھی

کبھی تو کھائے گا منہ کی مزاجِ عشرت بھی

حجاب ہے حق و باطل کے بیچ ، حجت بھی

حجاب، کفر کے ماروں کی ہوگی تُربت بھی

حجاب دین بھی اور دینِ حق کی دعوت بھی

حجاب ہی سے چھٹے گی جفا کی ظلمت بھی

حجاب پر کرے ملت بھی غور، عورت بھی

نکل کے عدل کی آئے گی کوئی صورت بھی

حجاب کیا ہے! جہاں سے کہو حقیقت بھی

حجاب سورہٴ احزاب کی ہے آیت بھی