Daagh, Urdu Ghazal By Azeez Belgaumi

منزلِ مقصود پر ہیں اپنی رُسوائی کے داغ

ساتھ ہم لے کر گئے تھے، آبلہ پائی کے داغ

جن کو تم شعر و سخن کی کہکشاں کہتے رہے

اصل میں قرطاس پر تھے، خامہ فرسائی کے داغ

کچھ نظر آتا نہیں، کچھ بھی نظر آتا نہیں

ان کے چہروں پر اُبھر آئے ہیں بینائی کے داغ

مجھ کو خود اپنے ہی بل پر کام کرنا آ گیا

پیٹھ پر تھے ثبت میری، ہمت افزائی کے داغ

جھوٹ کے دامانِ ابیض پر ہوئے ہیں جو نثار

ناپسندیدہ ہیں اُن لوگوں کو، سچائی کے داغ

فتنہ جُو دانشوروں نے کر دیا پاگل ہمیں

ذہن پر اُبھرے ہوئے ہیں اِن کی دانائی کے داغ

ڈھونڈتا پھرتا ہے یاروں کی رفاقت کو عزیز

مضطرب کرنے لگے ہیں اُس کو تنہائی کے داغ