Aql-mand Shikari, Urdu Nazam By Hafeez Karnatki

ganw mein sher ka ek shikari bhi tha
khata tha dasht ki wo hamesha hawa
sher ko us ne qabze mein ek din kiya
sham hoti gai baDh gaya dhundalka
bakriyon ko bhi wo palta tha sada
ghas bhi dasht se sath wo lata tha
ghas aur bakri bhi us ke hamrah the
sher ke sath dekho ye donon chale
rah mein un ki pul ek hail hua
dhundalka gahra hone laga sham ka
pul ke rakhwale ne us ko roka kaha
par tum pul ko kar sakte ho barmala
sirf ek chiz ko sath le jaoge
apni manzil ko phir dekh lo paoge
tum jo chaho to wapas bhi aa sakte ho
ek shai sath apne bhi la sakte ho
soch mein paD gaya ab shikari bahut
shart thi waqai aaj bhaari bahut
ghas ko sath le jaana mushkil hi tha
kyun ki KHud sher bakri ko kha jaega
han agar sher ko sath le jaunga
bakri chaara bana Dalegi ghas ka
kashmakash mein shikari abhi paD gaya
kaise hal hoga hai ye baDa masala
ab use kuchh samajh mein to aaya nahin
sochte sochte jhuk gai thi jabin
ek tarkib aaKHir ko sujhi use
pul se guzra wo ab bachcho bakri liye
par bakri ne ai bachcho pul jo kiya
ghas ko sher bas sungh kar rah gaya
aaya wapas palaT kar shikari abhi
us ki aankhon mein bachcho chamak jag uThi
is taraf sher aur us taraf bakri thi
ghas le jaane ki bari ab aa gai
ghas ka gaTTha sath apne wo le gaya
sher bas munh shikari ka takta raha
ghas ko bakri ke pas us ne rakkha
aur bakri ko KHud us ne wapas liya
is taraf ghas ka sirf gaTha raha
kyun ki KHatra milan sher o bakri ka tha
is liye sher ko sath le kar chala
sher ko ghas ke pas chhoDa gaya
sochiye ghas ko sher khaega kya
ghas ko sher bas sungh kar rah gaya
ab shikari chala bakri lane ko sath
ab ke bakri ki rassi pe tha us ka hath
ab wo bakri ke hamrah aa hi gaya
sher dil mein hi KHud ghurraata raha
ek jaanib thi bakri to ek samt sher
ki nahin ab shikari ne jaane mein der
ghas ka gaTha sar par shikari ke tha
ganw ka apne ab us ne rasta liya
yun shikari ne gutthi ko suljha liya
un ke jaane ka bhi masala hal hua