Bayad E Ahmad Faraz

بیاد ِ احمد فراز

بیاد ِ احمد فراز

تُو کہ ہم سے ہے بصد ناز گریزاں جاناں

’’یاد کیا تجھ کو دلائیں ترا پیماں جاناں’’

چل یہ مانا کہ تجھے یاد نہیں کچھ بھی۔ مگر

یہ چمکتا ہوا کیا ہے سر ِ مژگاں جاناں

آج قدموں تلے روندی ہے کلاہ ِ پندار

آج وا مجھ پہ ہوا ہے در ِ امکاں جاناں

میں بھی کیا چیز ہوں آخر، جو یہاں میرے لے

ہیں فنا اور بقا دست و گریباں جاناں

خواب، تنہائی، تری یاد، مرا ذوق ِ سخن

عمر بھر کے لیے کافی ہے یہ ساماں جاناں

زندگی ٹھہری ہوئی، اور گزرتی ہوئی عمر

دیکھ کیا کچھ ہے یہاں ساکت و جنباں جاناں

جتنی زنجیر ہے، اُتنی ہی مری حدّ ِ سفر

ہے مری حدّ ِ نظر وسعت ِ زنداں جاناں

ابھی حالات موافق ہیں تو کچھ طے کرلیں

کتنا ٹھہرے گی بھلا گردش ِ دوراں جاناں

اک ترے غم کی کمی تھی تری دیوانے کو

ورنہ وحشت تو یہاں تھی ہی فراواں جاناں

درد تازہ بھی ہے، گہرا بھی ہے، جاں سوز بھی ہے

کوئی مرہم، کوئی نشتر، کوئی درماں جاناں

اپنا تو ایک ہی لہجہ ہے یہ، سیدھا، سچا

بزم ِ احباب ہو، یا بزم ِ حریفاں جاناں

اور ہوں گے جو ترے عشق کی تشہیر کریں

ہم نہیں وہ، جو کریں چاک گریباں جاناں

پوچھتا رہتا ہوں اکثر، کہ ہُوا کیا ہے تجھے؟

کچھ بتاتا ہی نہیں ہے دل ِ ناداں جاناں

جُز دعا نذرگزارے گا تجھے کیا یہ فقیر؟

جا تری خیر، خدا تیرا نگہباں جاناں

’’خلقت ِ شہر تو کہنے کو فسانے مانگے’’

ہم بہت خوش ہیں ترے بعد، ارے ہاں جاناں

ہم جہاں جائیں یونہی خاک اڑاتے جائیں

پاوٗں کے ساتھ بندھا ہے یہ بیاباں جاناں

یاد آتا تو بہت ہوگا تجھے جان ِ فراز

کس قدر پیار سے کہتا تھا وہ جاناں، جاناں

ہائے کیا وقت تھا، اس بام پہ ہوتے تھے فراز

اب جہاں ہوتا ہے عرفان غزل خواں، جاناں

عرفان ستار

© UrduPoint.com

All Rights Reserved

(196) ووٹ وصول ہوئے

Your Thoughts and Comments

Urdu Nazam Poetry of Irfan Sattar, Bayad E Ahmad Faraz in Urdu. This famous Urdu Shayari is a Ghazal, and the type of this Nazam is Sad, Social, Friendship, Heart Broken, Hope Urdu Poetry. Also there are 92 Urdu poetry collection of the poet published on the site. The average rating for this Urdu Shayari by our users is 4.1 out of 5 stars. Read the Sad, Social, Friendship, Heart Broken, Hope poetry online by the poet. You can also read Best Urdu Nazam and Top Urdu Ghazal of Irfan Sattar.