AaKHir Ye Husn Chhup Na Sakega Naqab Mein, Urdu Ghazal By Ismail Merathi

aaKHir ye husn chhup na sakega naqab mein
sharmaoge tumhin na karo zid hijab mein

pamal shoKHiyon mein karo tum zamin ko
Dalun falak pe zalzale mein iztirab mein

raushan hai aaftab ki nisbat charagh se
nisbat wahi hai aap mein aur aaftab mein

dil ki girah na wa hui dard-e-shab-e-visal
guzri tamam bast-o-kushad-e-naqab mein

jaan main ne nama-bar ke qadam par nisar ki
tha pesh-e-pa fatada ye mazmun jawab mein

hans hans ke barq ko to zara kije be-qarar
ro ro ke abr ko main Dubota hun aab mein

waiz se Dar gae ki na shamil hue hum aaj
tartib-e-mahfil-e-mai-o-chag-o-rabab mein

saqi idhar to dekh ki hum dair-e-mast hain
kuchh masti-e-nigah bhi mila de sharab mein

daKHil na dushmanon mein na ahbab mein shumar
madd-e-fuzul hun main tumhaare hisab mein

kis kis ke jaur uThaenge aage ko dekhiye
dushman hai charKH-e-pir zaman-e-shabab mein

paighambar ishaara-e-abru se mar gaya
phir ji uThega lab bhi hila do jawab mein