Main Janta Hoon Aap Sa Koi Nahi Kahin Nahi, Urdu Ghazal By Kashif Aura

میں جانتا ہوں آپ سا کوئی نہیں کہیں نہیں

کوئی نہیں ہے آسماں کوئی بھی سر زمیں نہیں

میں خواب ٹوٹنے کے بعد آنکھ کیوں نہ پھوڑ لوں

تُو جا رہا ہو اور میں یہ دیکھ لوں نہیں نہیں

وہ آستین جھاڑ کر کسی کی اور چل دیا

میں اس پہ کہتا رہ گیا نہیں اے دلنشیں نہیں

تُو خواب بیچنے کی بات کر رہا ہے خواب میں

جو دیکھ لے وہ روشنی تو کہہ اٹھے نہیں نہیں

میں زندگی کے ہاتھ سے نہ گر پڑوں تُو تھام لے

تُو آسماں ہے دیکھ لے یہ میری سر زمیں نہیں

میں جس کسی کے ساتھ ہوں تجھے نہ کوئی فکر ہو

مجھے بتا کہ حُسن میں تُو سب سے اولیں نہیں؟

تمہارے ساتھ بیٹھ کر میں سوچتا ہوں زندگی

حسین شاہکار ہے پر آپ سا حسیں نہیں

لکیر کھینچتے ہوئے خدا کو ڈھونڈ لو گے تم؟

یہ مسجدیں علامتیں ہیں پورا پورا دیں نہیں

تمام شب کسی کا ساتھ چھوڑنے کے عہد ہوں

تمام دن یہی کہوں! کبھی نہیں نہیں نہیں